24 tamyzda Á.Qasteev atyn­daǵy Memlekettik óner mu­ra­jaıynyń fılıaly – Or­talyq kórme zalynda sol eskızder men maketterdiń kórmesi uıym­dastyryldy. Músin eskız­deri men maketteriniń basym kópshiligi Almaty, Astana jáne О́skemen qalalarynan qatysty.

Sonymen baıqaýdyń bas júldesin Almatydan qatysqan T.Júrgenov atyndaǵy Qazaq Ulttyq óner akademııasynyń túlek­teri músinshiler Dýlat Úsenbaev, Aıdos Búrkitbaev, Qanat Be­gýlıev, Álimjan Toq­baevtar shy­ǵarmashylyq kvar­teti jeńip aldy. Bul jigitterdiń jumysy «Bo­lashaqqa kózqaras» dep atalady.

Jeńiske jetken jigitterdiń birlesip eńbek etkenine birneshe jyl ǵana bolǵan jáne buǵan deıin Almaty qalasynda 31 mamyrda asharshylyq qurban­daryna qoıylǵan eskertkishtiń baıqaýynda bas júldege ıe bolǵan. Qazir ol eskertkish te Qabanbaı batyr men Naýryz­baı batyr kósheleriniń qıyly­syndaǵy qaraǵaıly baqta tur. Sol sııaqty tańdaýdan ót­ken taǵy birneshe týyndylary Almaty, Taldyqorǵan, Jańa­ózen qalalarynda tur.

Birikken tórt talant modern stılinde oryndalǵan músin­ge ár qyrynan kelgen. Má­se­len, Dýlat Úsenbaev keskin­de­me­shi bolsa, qalǵandary skýl­p­­týra, ıntererlik dızaı­nerlik turǵyda músinge óz qoltań­ba­laryn kiriktirgen.

– Bul baıqaý bizge shabyt pen materıaldyq ıgilik alyp keledi. Bizge baıqaýdyń uıymdastyrylý deńgeıi unady. Jarty jyl buryn jarııalandy. Báseke barysynda onyń búkil jaı-japsary habarlanyp turdy. Ataqty jáne myq­ty músinshilermen qatar baq synadyq. Barlyq jumystar men olardyń tujyrymdamalaryn kórip otyrdyq, – deıdi kes­kindemeshi Dýlat Úsenbaev. 

Sonymen Polpharma toby Baqylaý keńesiniń hatshysy, «Starak Family Foundation» qorynyń prezıdenti Eljbeta Djıkovska «Bolashaqqa kóz­qaras» músini Qazaqstan Prezı­denti janyndaǵy Sheteldik ınvestorlar keńesiniń otyrysy kezinde 2019 jyldyń maýsymynda Shymkenttegi SANTO kom­panııasynyń zaýytyna qo­ıy­lyp, saltanatty túrde ashylady dedi.

Bul týyndynyń aıtar oıy tómendegideı: Adamnyń basy – ǵylymı-tehnıkalyq órleý men ónerdiń qozǵaltqyshy. Ol bolashaqqa kóz salady, barlyq jańany qabyldaýǵa daıyn. 

Aınash ESALI,

«Egemen Qazaqstan»

ALMATY