«Abylaı han» rezıdensııasy» murajaı-kesheninde ornalasqan «Damask quryshynan soǵylǵan sýyq qarý-jaraq» kórmesi Qazaqstan men Reseı arasyndaǵy óńiraralyq shekaralyq yntymaqtastyqtyń HV forýmyna arnaldy.
«Lıga» seriktestiginiń ónimderi jurtshylyqqa jaqsy tanymal. Onyń dırektory Vıktor Javoronkov sýyq jáne kádesyılyq qarý-jaraq túrlerin jasaýmen shırek ǵasyrǵa jýyq aınalysyp keledi. Osy ýaqyt aralyǵynda qarý-jaraqtyń alpystan astam túrin usynypty. Olardyń arasynda qazaq handary men batyrlarynyń qaıqy qylysh, aıbalta, qolshoqpar sekildi qarýlary úlken suranysqa ıe. Kolleksııada sondaı-aq Áziret Áliniń zulpyqary, saq semseri-akınak, Anglııa patshasy Artýrdyń eskalıbýry, mámlúkterdiń, Ortalyq jáne Shyǵys Azııa elderiniń, japondardyń, úndilikterdiń, túrikterdiń, orystardyń, kazaktardyń qarýlary da bar.
«Kásiporynda onbes adam eńbek etedi. Árqaısysy óz isiniń maıtalman sheberleri sanalady. Bir týyndyny jasaýǵa úsh aıǵa deıin ýaqyt ketedi. Soǵan oraı baǵasy da árqıly. Jarty mıllon teńgege deıin baǵalanatyn dúnıelikter joq emes. Ádemiligimen qosa jasalý tehnıkasyna da basa nazar aýdaramyz. Ár qarýdyń óz tarıhy bar. Arnaıy tapsyrystar kóptep túsip jatady, deıdi Vıktor Pavlovıch.
Musylmandardyń aty ańyzǵa aınalǵan batyry, ıslam dinindegi óte ádil halıfalardyń biri Áziret Álige Muhammed/ǵ.s.ǵ./paıǵambarymyzdan muraǵa qalǵan ushy aıyr qylysh-zulpyqardy tamashalaýshylar qatary qalyń. Eki júzdi, ushy ótkir, qysqa sapty qarýlar quryshtan soǵylǵandyqtan myqty. Qashqar, Balasaǵun, Shash, Otyrar qalalarynan qalǵan jurnaqty, eski jádigerdi kózge elestetedi. Qaıqy qylyshtar, uzyndy-qysqaly pyshaqtar, áskerı asataıaq, qolshoqpar jasalý sheberligimen erekshe súısindiredi.
Damask bolatynan quıylǵan avtorlyq sýyq jáne eksponat qarý-jaraqtar kórmesin almatylyqtar men astanalyqtar, máskeýlikter de qyzyǵa tamashalapty.
О́mir ESQALI,
«Egemen Qazaqstan»
Soltústik Qazaqstan oblysy