Tarbaǵataı ólkesin sóz etkende tamyry sonaý saq dáýirlerine qaraı tereńdeı túsetin ǵasyrlar kúmbiri qulaqqa jetkendeı bolady. О́ńirdiń tarıhı kelbeti Shyǵys Qazaqstan jerinde júrgizilgen arheologııalyq qazba jumystarynyń nátıjesinde tabylǵan jádigerlerdiń mańyzdylyǵynan-aq aıshyqtalyp turǵandaı. Almatydaǵy Ulttyq kitaphanada ótken kezdesýde elimizge belgili qalamgerler, bıznes jáne BAQ ókilderi «Tarıhqa toly Tarbaǵataı» almanahynyń tanystyrylymyn ótkizip, ǵajaıyp ólkeniń tyń derekterine qanyqty.
Kitapty arheolog Erden Oralbaı qurastyryp jınaqtasa, kórkemdep, erekshe dızaınmen jaryqqa shyǵaryp qoldaý kórsetýde «Asyl tas» kompanııasynyń dırektory Dýlat Tastekeevtiń eńbegi zor. Bıylǵy jyly úshinshi basylymy jaryqqa shyǵyp otyrǵan kitap jeti bólimmen tolyqtyrylǵan eken. «Altaıdan Arqaǵa deıin...» bólimine kóne zaman eskertkishteri, arheologııalyq zertteýler barysy, ǵalymdardyń zertteý maqalalary, saıahatshylardyń estelikteri ense, «Erlikke toly sol zaman» bóliminde qazaq halqynyń basqynshylarǵa qarsy erlikke toly kúresi, Shyńǵystaý men Qalbaǵa, Altaı men Tarbaǵataıǵa qaıta qonystanýy, Abylaı han bastaǵan batyrlar joryǵy, bıler men qaharmandar týraly málimetter keltirilgen. Osylaısha óńir tarıhyn aıshyqtaıtyn «Halqymnyń qıly taǵdyry», «El ishi – óner kenishi», «Qýatty sharýashylyq, buljymas zań – el damýynyń negizi», t.b. bólimder búginde osy óńirdiń damýyna úles qosqan azamattardyń eren erlikterine arnalady.
Almanah Memlekettik syılyqtyń ıegeri Doshan Joljaqsynovtyń alǵysózimen bastalypty. Al osy ıgi iske qoldaýshy bolyp júrgen Dýlat Tastekeev «Baıtaq elimizdiń ár túkpiri jaıly qazbalap zertteıtin bolsaq, áli talaı kitap jazýǵa bolady. Bizdiń armanymyz – osy jobanyń úlgisimen árbir ólkeniń belsendi azamattary týǵan óńiri jaıly qyzyqty jazbalar beretin paraqsha ashsa, sóıtip Qazaqstannyń búkil aýmaǵynda ólketaný ǵylymyn jandandyryp, ekotýrızmdi damytsa... Týǵan ólke jaıly jastarǵa bilim beretin, nasıhattaıtyn, sol arqyly Otanyna degen súıispenshiligin arttyryp, el tarıhyna degen qurmetin asqaqtatatyn osyndaı áleýmettik jobalar kóbeıe bersin» degen pikirin bildirdi.
Elvıra SERIKQYZY,
«Egemen Qazaqstan»
ALMATY