Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev Qazaqstanǵa Digital Bridge forýmyna jáne Astana Hub AT-startaptar halyqaralyq tehnoparkiniń tanystyrylymyna qatysý úshin resmı saparmen kelgen Estonııa Respýblıkasynyń Premer-Mınıstri Iýrı Rataspen kezdesý ótkizdi.
Kezdesý barysynda eki eldiń aqparattyq tehnologııalar salasyndaǵy yntymaqtastyǵyn odan ári nyǵaıtý jáne keńeıtý, sondaı-aq, ekonomıkanyń mańyzdy sektorlaryn sıfrlandyrý máseleleri talqylandy. Olardyń arasynda bilim berý, densaýlyq saqtaý, saýda, kólik jáne logıstıka salalary bar. «Jasyl kópir» prezıdenttik bastamasy aıasynda júzege asyrylǵan Jasyl tehnologııalar ortalyǵynyń bazasynda jáne jalpy qaldyqtardy kádege jaratý salasyndaǵy yntymaqtastyq máseleleri qaraldy.
Aýyl sharýashylyǵy, kedendik deklarasııalaýdy avtomattandyrý, sondaı-aq sıfrlyq ekonomıka úshin bilikti kadrlardy daıarlaýda tájirıbemen almasý salasyndaǵy ózara is-qımyl perspektıvalaryna erekshe nazar aýdaryldy.
B. Saǵyntaev qazaqstandyq taraptyń sıfrlandyrý salasynda, ásirese, Astanada «Ekspo» aýmaǵynda halyqaralyq AT-ýnıversıtetti ashý josparlaryn eskere otyryp, AT mamandaryn daıarlaý boıynsha tájirıbe almasýǵa úlken qyzyǵýshylyq tanytatynyn jetkizdi.
О́z kezeginde Iý. Ratas forýmǵa shaqyrǵany úshin alǵysyn bildirdi, sonymen qatar ekijaqty qarym-qatynastardyń joǵary áleýetin jáne Estonııanyń odan ári yntymaqtasýǵa degen yqylasyn atap ótti.
2018 jyldyń qańtar–tamyz aılarynda Qazaqstan men Estonııa arasyndaǵy taýar aınalymy $21,7 mln (eksport – $4,7 mln, ımport – $17 mln) qurady. 2005 jyldan bastap 2018 jyldyń II toqsanyna deıin Estonııa Respýblıkasynan Qazaqstanǵa tikeleı ınvestısııalardyń jalpy aǵyny $70,2 mln qurady. QR-da estonııalyq kapıtaly bar 70 astam birlesken kásiporyn tirkelgen.
Turaqty ekonomıkalyq ósimge qol jetkizý, ekonomıka men ulttyń básekege qabilettiligin arttyrý, halyqtyń ómir sapasyn jaqsartý úshin sıfrlyq ekojúıeni damytý maqsatynda «Sıfrlyq Qazaqstan» baǵdarlamasy qabyldandy, ol basty tórt baǵytty qamtıdy.
«Sıfrlyq Jibek jolyn iske asyrý» — senimdi, qoljetimdi, jyldamdyǵy joǵary jáne qorǵalǵan sıfrlyq ınfraqurylymdy damytý.
Kreatıvti qoǵamdy damytý — sıfrlyq ekonomıka úshin quzyrettilikter men daǵdylardy úırený, halyqtyń sıfrlyq saýattylyǵyn arttyrý, salalar úshin AKT mamandaryn daıyndaý.
Ekonomıka salalaryndaǵy sıfrlyq túrlený — ekonomıkanyń túrli salalarynyń básekege qabilettiligin arttyrý úshin sıfrlyq tehnologııalardy jappaı engizý.
Proaktıvti memleketke kóshý — elektrondy jáne mobıldi úkimet júıesin jetildirý, memlekettik qyzmet kórsetý salasyn ońtaılandyrý.