Esimi shetelge jaqsy málim monýmentalıst sýretshi Nurlan Taıyrov «Týǵan óńir–tunǵan syr» jobasy aıasynda oblys ortalyǵynda tuńǵysh sýret kórmesin uıymdastyryp, jerlesterin óziniń óner jolymen jan-jaqty tanystyrdy.
Nurlan – Reseı Sýretshiler odaǵynyń múshesi. Mektepte júrgende sýret salýǵa degen áýestigi balalyq qushtarlyqqa ulasyp, Petropavl óner kolledjin bitiredi. Bekzat ónerge degen erekshe yqylas-peıiliniń arqasynda Novosibir sáýlet akademııasyn aıaqtap, shekaralyq aımaqta turaqtap qalady. Jyraqta júrse de, ol úshin shyr etip dúnıege kelgen týǵan jerdiń orny bólek, ystyq. Atamekenge degen perzenttik ystyq sezimin, bala mahabbatyn shyǵarmalarynda shabyttana beınelep, birqydyrý portrettik, sıýjettik toptamalar arnapty. Ár týyndysynan ózindik órnek, ulttyq naqysh, syrly sezim anyq ańǵarylady. Taqyryp aıasy da keń, san alýan.
О́zindik stıli qalyptasqan óner ıesi qyzyljarlyqtarǵa birneshe sıkldan turatyn «Beıne men tús» atty sýretter toptamasyn usyndy. Baıyrǵy kezeń men qazirgi qubylmaly zamannyń san qatparly qubylystary men tylsym syrlaryn, rýhanı uqsastyqtary men aıyrmashylyqtaryn tamasha úndestire de, shendestire de biletin Nurlan ózara úılesim tapqan túrli-tústi boıaýlar arqyly sýret álemine tereń boılaıdy, obrazdar galereıasyn jasaıdy.
Al kemel sýretshiniń grek mıfologııasyna qalam tartqan sýretter jıyntyǵy – ózgeshe bir álem. Antıkalyq dáýirdiń jumbaq álemin óte nanymdy kórsete bilgeni sonshalyq, «Orfeıdiń ajaly» kartınasy birneshe mánerde beınelenip, ushqyr qııal erkin qanat qaǵady, kók álemin kezedi. Shalqar shabyt, talant taǵylymy degen osy bolar!
Talǵampazdyǵy, izdenimpazdyǵy, oı kókjıeginiń keńdigi, ádemilikti, sulýlyqty áspetteýdi ár boıaý arqyly uqtyrady desek, artyq aıtqandyq bolmas.
– Myna sýretti salý ıdeıasy aıaqasty týdy. Tramvaıda janyma bir ádemi kelinshek otyrdy. Quddy mektep oqýshysy sekildi. Áleýmettik jelige búkil aqyl-esimen, oı-sanasymen berilgeni sonshalyq, ózin de, ózgelerdi de múldem umytty. Qashan aıaldamaǵa jetkenshe onyń bar qımylyn kóz qyrymmen baǵyp otyrdym. Smartfondar adam ómiriniń aınymas bir bólshegine aınalyp bara ma degen sumdyq qaýip, áldebir belgisizdik kúsh tula-boıymdy tumshalap aldy. Onyń túsinip bolmas bul áreketi jalǵan dúnıeden múldem bólektenip, jany da, táni de ózge ǵalamda júrgendeı kúı keshtirdi, – deıdi N.Taıyrov.
Osy ispettes kartınalar abstraktili, stıhııaly, shym-shytyryq syzyqtar men keskindemeler qurandysy ispetti kóringenimen, túpqazyǵy aýyr oılarǵa, salmaqty suraqtarǵa jeteleıdi.
О́mir ESQALI,
«Egemen Qazaqstan»
Soltústik Qazaqstan oblysy