Denıs Ten Qazaqstan Respýblıkasy IIM basshysy polısııa general-polkovnıgi Qalmuhanbet Qasymovtyń buıryǵymen «Quqyq tártibin qamtamasyz etýge qosqan úlesi úshin» medalimen qaıtys bolǵannan keıin marapattaldy. Búgin Almatyda marapatty mánerlep syrǵanaýshynyń ákesine Ulttyq ulan Bas qolbasshysynyń tárbıe jáne áleýmettik-quqytyq jumystar jónindegi orynbasary general-maıor Muhametqalı Satov tabys etti, dep habarlaıdy QR Ulttyq ulanynyń baspasóz qyzmeti.
«Ol máńgilikke bizdiń júregimizde qalady…» atty taqyryptyq kesh «Ońtústik» óńirlik qolbasshylyǵynda bolyp ótti. Oǵan óńirlik qolbasshylyqtyń basshylyǵy, ardagerleri, jeke quramy, Denıstiń ákesi Iýrıı Ten, bıatlon boıynsha qysqy Olımpıada oıyndarynyń kúmis júldegeri zapastaǵy kapıtan Elena Hrýstaleva, semserlesýden 2018 jyldyń Azııa oıyndarynyń jeńimpazy efreıtor Dmıtrıı Aleksanın jáne taǵy basqalar qatysty.
- Ol bul jerde jas jaýynger kýrsynan ótti. Ant qabyldady, jıi-jıi sporttyq sharalarǵa keletin. Jedel áskerı qyzmetten keıin, kelisimshart boıynsha qyzmetti jalǵastyrǵysy keldi. Bolashaǵynan úmit kúttirer sportshy jáne bizdiń áskerı qyzmetshiniń Ulttyq ulannyń shtattyq sporttyq komanda quramyna kirýi zańdy edi , - dep Denıs Ten týraly Ulttyq ulan Bas qolbasshysynyń tárbıe jáne áleýmettik-quqytyq jumystar jónindegi orynbasary general-maıor Muhametqalı Satov óz esteligimen bólisti.
Jaýyngerlik jáne qyzmettik mindetin úlgili atqarǵany, qoǵamdyq tártipti kúzetýge belsendi qatysqany, sondaı-aq, estremaldy jaǵdaıda kórsetken erligi men jankeshtiligi úshin leıtenant Denıs Ten qaıtys bolǵannan keıin «Quqyq tártibin qamtamasyz etýge qosqan úlesi úshin» medalimen marapattaldy. Marapatty mánerlep syrǵanaýshynyń ákesine general-maıor Muhametqalı Satov tapsyryp, Denıs ulandyqtardyń jadynda máńgilikke qalatynyn jáne onyń úlgisinde jas Otan qorǵaýshylar tárbıelenetini týraly aıtyp ótti.
- Denıs árqashan sportpen shuǵyldandy, onyń basqa nársege alańdaıtyny baıqalmady. Ár kezde jattyǵýlar, jazdyń ózinde tynym almaıtyn, bir maýsymnan kelesi maýsymǵa daıyndyq ústinde bolatyn. Ol áskerı qyzmetshilermen kezdesýge ýaqyt tabatyn. О́kinishke oraı, tek onyń ajaly ǵana halyqtyń oǵan degen mahabbatynyń sonshalyqty úlken ekenin kórsetti, - degen Iýrıı Ten Ulttyq ulan basshylyǵyna qoldaý úshin alǵysyn aıtty.
2011 - 2012 jyldary Denıs jedel áskerı qyzmetin Almaty qalasy 7552 áskerı bóliminde atqardy. Ol áskerı qyzmetti kelisimshart negizinde Ulttyq ulannyń shtattyq sporttyq komanda quramynda jalǵastyrý usynysyn úlken yjdahattylyqpen qabyldady.
Bastapqyda ol dene daıarlyǵy boıynsha aǵa nusqaýshy laýazymynda bolyp, «kishi serjant» áskerı shenine deıin kóterildi. Keıin Sochıde Qazaqstanǵa qola medaldi utyp alǵanda Denıstiń ofıser bolatynyna eshkim shúbá keltirgen joq.
Denıs sondaı-aq, qazaqtandyqtardyń jas býyny úshin eńbekqorlyq pen jigerliliktiń úlgisi retinde áskerı qyzmetshilerdiń áskerı-patrıottyq tárbıesine de belsendi qatysty.
Eske túsirip ótsek, jaqyn kúnderi áıgili fıgýrısti eske alýǵa baılanysty onyń týǵan qalasy Almatyda birneshe shara bolyp ótti. Bul Denıs Ten týyp-ósken úıde memorıaldy taqtanyń ashylýy, «Halyk Arena» sport kesheninde Denıs Ten qory kesenesiniń tusaýkeseri.
Atalmysh fond Denıs Tenge arnap Astanadaǵy «MegaSilkWay» saýda ortalyǵynda fotokórme uıymdastyrady. Onyń ashylýy 10 qarasha saǵat 17.00-de 2 qabatta ótip, 10 kún boıy jalǵasady