Belgili qylqalam sheberi Nurbolat Ysqaqovtyń qoltańbasynan týǵan portrettik beıneler adam boıyndaǵy sezim sáýleleri arqyly baıandalady. Sýretshiniń bul saladaǵy alǵashqy kólemdi eńbeginiń biri – Muqaǵalı Maqataevtyń túrli kezeńderindegi portretteri.
Muqaǵalıdyń ózine ǵana tán qaıtalanbas beınesin bederleýge degen shynaıy umtylys sýretshige shabyt bergen. Munyń aqynnyń alǵashqy tıptik portretteriniń jaryqqa shyǵýyna da septigin tıgizgeni anyq. Myna portretterdegi bes túrli Muqaǵalı beınesi aqyn kóńil kúıin san qyrynan tanytardaı. Onyń adam retinde jáne aqyn retindegi obrazy qorshaǵan orta arqyly sıpattalady. Qylqalam ıesi «Aqyn degen tabıǵat qoı, qysy, kúzi, jazy bar» dep Muqaǵalıdyń ózi aıtqandaı, aqyn janynyń san taraý yrǵaqtaryn, ishki bulqynysyn, júrek tolǵanysyn, áp-sátte qubylatyn kóńil kúıin tap basýǵa talpynady.
Jan balasyn jatsynbaı jan syryn jaıyp salatyn aqedil ańǵaldyq, sál jalǵandyq sezilse qara aspandaı bulttanatyn naızaǵaı tektes ór minez, jasqa da, kárige de qushaǵyn birdeı ashatyn qarapaıym qasıet, sábıdeı pák alǵaýsyz kóńil tazalyǵy, aınymas azamattyq bolmys – bizdiń oıymyzdaǵy Muqaǵalı tulǵasy. Sýretshi aqyn boıyndaǵy dál osy qasıetterdi aınytpaı keıipteýge kúsh salǵan.
– Jasymnan Muqaǵalıdy jata-jastana oqydym. Onyń álemine óleńi arqyly boıladym. Muqaǵalı óleńderindegi kóptegen keıipkerlerdi beıneledim.
Qýlary qyrdyń qyzyl túlkisi der, Momyny bizdiń úıdiń kirpishi der. Máńgilikke ózimmen ala ketken, Meniń názik janymdy kim túsiner, – dep aqyn ózi jyrǵa qosqandaı, onyń ishki álemin, salqar saǵynyshyn, asaý shabyttyń tynymsyz toǵysqan tasqyndaryn óz dárejesinde túsine almaǵan da shyǵarmyz. Dese de portrettik beıneler arqyly kórermendi Muqaǵalı álemine boılatýdy murat tuttym, – deıdi Qazaqstan Sýretshiler odaǵynyń múshesi Nurbolat Ysqaqov.
Muqaǵalı óz kúndeliginde: «Meni adamnyń ózi, syrtqy súlderi emes, minez-qulqy, qatynasy, oıy men psıhologııasy qyzyqtyrady. Olardy túsinýge tyrysamyn. Adamdardy túsine otyryp, olardyń da meni túsingenin qalaımyn» dep jazypty. Biz aqynnyń jan dúnıesin ómiriniń ózegine aınalǵan óleńderinen tanyǵandaı bolamyz. Kóńil kógimizde saqtalyp qalǵan saǵynysh sezimderi, aqyn dıdaryn ashatyn mundaı beıneler janarǵa jasyrynǵan máńgilik jumbaq álemge jeteleıtindeı kórinedi de turady.
Arman OKTIаBR,
«Egemen Qazaqstan»
ALMATY