Kezdesý barysynda Nursultan Nazarbaev Joze Manýel Barrozýǵa Astana klýbynyń otyrysyna kelgeni úshin rızashylyq bildirdi, dep habarlaıdy Aqordanyń baspasóz qyzmeti.
Memleket basshysy Eýropalyq komıssııanyń burynǵy tóraǵasynyń Qazaqstan men Eýropa odaǵy arasyndaǵy qarym-qatynastardy nyǵaıtý isine qosqan úlesin atap ótti.
– Men Sizben taǵy da júzdesip otyrǵanyma qýanyshtymyn. Siz árdaıym Qazaqstanǵa qoldaý kórsettińiz. Sonyń arqasynda elimizdiń Eýropa odaǵymen seriktestigi jónindegi kelisimge qol qoıyldy. Qazirgi tańda bul qujat ratıfıkasııalaný úderisinen ótip jatyr, – dedi Qazaqstan Prezıdenti.
Joze Manýel Barrozý kezdeskeni jáne Astana klýbynyń jumysyna qatysýǵa shaqyrǵany úshin Nursultan Nazarbaevqa alǵys aıtty.
– Sizben qaıta kezdesý – men úshin zor mártebe. Brıýsselge tarıhı saparmen kelgenińiz esimde. Sol kezde Qazaqstan men Eýropa odaǵy arasynda yntymaqtastyq ornatý jóninde tarıhı sheshim qabyldanǵan bolatyn. Búginde Qazaqstannyń turaqtylyqty saqtap, óńirde mańyzdy ról atqaryp otyrǵanyn kórgenime qýanyshtymyn, – dedi Eýropalyq komıssııanyń burynǵy tóraǵasy.