Aqtóbe oblysynda ótken Agrarlyq máseleler, tabıǵatty paıdalaný jáne aýyldyq aımaqtardy damytý komıtetiniń kóshpeli otyrysynyń qorytyndysy boıynsha Senatta birqatar mınıstrlikterdiń basshylyǵymen kezdesý ótti, dep habarlaıdy Parlament Senatynyń baspasóz qyzmeti
Komıtet tóraǵasy Jeńis Nurǵalıev óz sózinde parlamentshiler Aqtóbede 2017 jylǵy 27 jeltoqsandaǵy «Jer qoınaýy jáne jer qoınaýyn paıdalaný týraly» kodeksin iske asyrý barysyn jáne agroónerkásip keshenindegi jaǵdaıdy jetildirý máselelerin talqylaǵanyn eske saldy.
Senator atap ótkendeı, Aqtóbe oblysy paıdaly qazbalarǵa baı aımaqtardyń qataryna kiredi. Aımaqta sondaı-aq aýylsharýashylyq ónimderin óndirý jáne qaıta óńdeý kólemi ulǵaıyp keledi. Osy oraıda, salalyq mekemeler men jergilikti kásiporyndardyń ókilderimen ótkizgen jıyn barysynda jer qoınaýyn paıdalaný jáne aýyl sharýashylyǵy salasyndaǵy máselelerdi sheshýge baǵyttalǵan birqatar naqty usynystar saralandy.
Ortalyq atqarýshy organdardyń ókilderi senatorlarǵa kóshpeli otyrys qorytyndysy boıynsha qabyldanǵan tıisti hattamalardyń oryndalýy týraly habarlady.
Energetıka mınıstriniń birinshi orynbasary Mahambet Dosmuhambetov pen ınvestısııalar jáne damý mınıstriniń orynbasary Tımýr Toqtabaev jer qoınaýyn paıdalaný týraly zańnamany júzege asyrýǵa baılanysty máselelerdi sheshý týraly depýtattardy habardar etti. Olar jer qoınaýyn paıdalaný týraly sharttardy jasaý jáne toqtatý tártibine, sondaı-aq, paıdaly qazbalardy óndirý úshin aýyl sharýashylyǵy jerlerin qaıtaryp alýǵa baılanysty máselelerge túsinikteme berdi.
Senator Muhtar Jumaǵazıev jer qoınaýyn paıdalaný týraly sharttardy toqtatý jónindegi komıssııa quramyna jergilikti atqarýshy organdardyń ókilderin qosý qajettigi týraly aıtty. Depýtat sondaı-aq qaıtaryp alatyn jerlerdiń ornyna sharýalarǵa ótemaqyny qarastyratyn naqty tetikter nemese quny soǵan sáıkes keletin jer ýchaskilerin usyný qajet dep esepteıdi.
Aýyl sharýashylyǵy mınıstriniń birinshi orynbasary Arman Evnıev aýyl sharýashylyǵy ónimderin óndirýshilerdi tolǵandyrǵan máselelerge oraı jaýap berdi. Salany memlekettik qoldaý sharalarynyń turaqtylyǵy, sýbsıdııalar men nesıe bólý tártibi jáne et ónimin shet elderge eksporttaýdy ilgeriletýdiń keleshegi talqylanǵan máselelerdiń qatarynda boldy.
Talqylaýǵa Aqtóbe oblysynyń aýyl sharýashylyǵy basqarmasynyń basshysy Qusaıyn Sársembaı, «Stepnoe» seriktestiginiń dırektory Amanǵos Tóleýov, «Parıjskaıa kommýnanyń» dırektory Gaık Terterıan men eksporttyq kásiporyn basshysy Almat Berdenov qatysty. Senat depýtattary Rashıt Ákimov, Bekmyrza Elamanov pen Dúısenǵazy Mýsın suraqtar qoıyp, óz usynystaryn ortaǵa saldy.