Almatyda Ekonomıka ınstıtýtynda Prezıdenttiń «Uly dalanyń jeti qyry» maqalasynyń negizgi basymdyqtaryn talqylaý maqsatynda «Rýhanı-tarıhı mura – qoǵamnyń áleýmettik jáne ekonomıkalyq órkendeýiniń negizi» taqyrybynda dóńgelek ústel ótti.
Maqala mazunyna oraı ǵalymdar HHI ǵasyrdaǵy ulttyq sana, memlekettiń básekege qabilettiligi, pragmatızm saıasaty, ulttyq biregeılikti saqtap qalý, bilim ǵurpy men mádenıetti damytý, Qazaqstannyń evolıýsııalyq damýy, sananyń ashyqtylyǵy, jańa tehnologııalardy endirý jáne damytý, t.b. taqyryptar aıasynda baıandama jasap, túrki áleminiń órkenıettegi róline qatysty tushymdy oılaryn ortaǵa saldy.
Sharany Ekonomıka ınstıtýty dırektorynyń ǵylym jónindegi orynbasary, ekonomıka ǵylymdarynyń kandıdaty, dosent Aqsanat Panzabekova júrgizdi.
A.Baıtursynuly atyndaǵy Til bilimi ınstıtýty dırektorynyń mindetin atqarýshy, fılologııa ǵylymdarynyń kandıdaty, dosent Sársenbaı Qulmanov «Uly dalanyń ulyqtyǵy: ǵulama ǵalymdar, ǵumyrly týyndylar, máńgilik mádenıet, óshpes órkenıet» taqyrybyndaǵy baıandama jasasa, ekonomıka ǵylymdarynyń kandıdaty, professor Táken Janataev «Uly dala mádenıetiniń Qazaqstannyń ekonomıkalyq damýyna tıgizetin yqpaly» turǵysynda óziniń zertteýlerimen bólisti.
«Tarıhta Túrki álemi myqty mádenıet pen órkenıet paıda bolyp, damyǵan ǵajaıyp keńistik retinde belgili. Túrki órkenıetiniń áseri álemdik tarıhtyń, mádenıettiń, tipten órkenıettiń barysyna zor yqpalyn tıgizdi. Túrki álemi óziniń ornalasýy jaǵynan da Shyǵys pen Batysty baılanystyryp turdy. Shyǵys pen Batys aralyǵyndaǵy aımaqqa ıelik ete otyryp Túrki álemi Uly Jibek jolynyń kúretamyry retinde eki órkenıetti baılanystyrdy. Buǵan tek VI sońyna qaraı múmkindik týdy. Dál sol kezeńde túrki qaǵanatynyń shekarasy batysta Vızantııamen, ońtústikte Parsy jáne Úndistanmen, al shyǵysynda Qytaımen túıisti. Osyǵan qarap kórshi elderdiń tarıhy túrki derjavasymen tyǵyz baılanysty bolǵan» dep atap ótti fılosofııa ǵylymdarynyń doktory, Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń professory Saǵadı Bólekbaev «Álemdik mádenıet pen órkenıettiń damýyna túrikterdiń qosqan úlesi» baıandamasynda.
Tarıh ǵylymdarynyń kandıdaty, qaýymdastyrylǵan professor, Shoqan Ýalıhanov atyndaǵy tarıh jáne etnologııa ınstıtýty Ǵylymı kadrlardy daıarlaý ortalyǵynyń meńgerýshisi Altyn Ýaltaeva «Uly dalanyń jeti qyry» úlgisindegi rýhanı jańǵyrý strategııasy» taqyrybyna keńinen toqtalyp ótti.
Sharaǵa QR UǴA akademıgi Amanjol Qoshanov, QR BǴM ǴK Ekonomıka ınstıtýtynyń bas ǵylymı qyzmetkeri, ekonomıka ǵylymdarynyń doktory, professor Farhat Dnishev, sondaı-aq ınstıtýttyń ǵylymı qyzmetkerleri, sarapshylar, jas ǵalymdar qatysty.
Sharaǵa qatysýshylar dóńgedek ústel barysynda rezolıýsııa qabyldap, mádenı jáne qundy baǵdarymyzdy qoldaý maqsatynda qoǵamnyń ıntellektýaldanýyna kúsh salý qajettiligi týraly usynystaryn bildirdi.
Elvıra Serikqyzy,
«Egemen Qazaqstan»
ALMATY