Elordada Sırııa daǵdarysy boıynsha Astana prosesi sheńberindegi kezekti, HI halyqaralyq kezdesý bolyp ótti. Onyń qorytyndysy boıynsha Astana formatynyń kepili retinde Iran, Reseı jáne Túrkııa taraptary Birlesken málimdeme qabyldady.
Málimdemeni qarsy alýshy jaq retinde Qazaqstan Respýblıkasynyń Syrtqy ister mınıstri Qaırat Ábdirahmanov baspasóz máslıhatynda jarııa etti. Onda taraptar Sırııa jónindegi HI halyqaralyq kezdesýdi Astanada uıymdastyrǵany úshin Qazaqstan Prezıdenti Nursultan Nazarbaevtyń jáne Qazaqstan bıliginiń atyna ózderiniń alǵystaryn bildirgen.
Sonymen qatar Birlesken málimdemede taraptar Sırııa Arab Respýblıkasynyń BUU Jarǵysy men qaǵıdattaryna sáıkes egemendigin, táýelsizdigin jáne aýmaqtyq tutastyǵynyń buzylmaýyn qoldaıdy delingen. Osy qaǵıdattar jappaı saqtalyp, Astana formatynda qol jetkizilgen kelisimderdi buzatyn barlyq áreketterge jol berilmeýi kerek. Sonymen qatar kepil berýshi taraptar terrorızmge qarsy kúres degendi syltaýratyp Sırııanyń egemendigi men terrıtorııalyq tutastyǵyna qol suǵatyn separatıstik áreketterge qarsylyq bildirýge keliskeni jarııalandy.
Málimdemede taraptardyń 2018 jyldyń 30-31 shildesinde sońǵy ret kezdeskennen bergi Sırııadaǵy jaǵdaıdyń qalaı damyǵany talqylanǵany aıtylyp, qol qoıylǵan shartqa sáıkes úshjaqty úılesimdilikti nyǵaıta berýge kelisilgeni de sóz bolǵan. Sonymen birge Idlıb deeskalasııa aımaǵyndaǵy jaǵdaı talqylanyp, ondaǵy jaǵdaıdy turaqtandyrý jónindegi Memorandýmnyń oryndalýyna taraptar daıyn ekendigi atap kórsetilgen. Atysty toqtatýdyń mańyzdylyǵy da atalyp, alaıda deeskalasııa aımaǵyn qurý Sırııanyń táýelsizdigi, egemendigi jáne aýmaqtyq tutastyǵyna qol suqpaýy kerektigi aıtylǵan.
Taraptar BUU Qaýipsizdik Keńesi terrorıstik uıymdar dep tanyǵan ILIM, «Djabhat an-Nýsra» jáne basqa da «Ál-Kaıdamen» baılanysy bar adamdar men uıymdardyń joıylǵanyn qalaıdy. Al Sırııanyń barlyq qarýly oppozısııasynyń qurylymdaryn bul uıymdardan irgesin aýlaq salýǵa shaqyrady. Sırııada hımııalyq qarý qoldanylǵany aıyptalyp, taraptar osy oqıǵaǵa baılanysty kásibı tekseristi halyqaralyq Hımııalyq qarýdy qoldanýǵa tyıym salý jónindegi uıymnyń júrgizgenin qalaıdy.
Sonymen birge taraptar Jumys toby sheńberindegi qanatqaqty jobanyń negizinde tutqyndar almasylǵanyn, ólgenderdiń máıitin berý jumystarynyń júrgizilgenin qoldaıdy. Al bosqyndardyń Otanyna oralýyna barlyq qaýipsizdik jaǵdaılardyń jasalýyn qoldaıtyndyǵy da aıtylǵan. Sondaı-aq Málimdemede taraptar BUU Bas hatshysynyń Sırııa boıynsha arnaýly ókili S.de Mıstýrege kıkiljińdi retteý baǵytynda jasaǵan jumystary úshin alǵys bildirgen.
Sóıtip kezekti kezdesý aıaqtaldy. Al kelissózderdiń kelesi raýndy 2019 jyldyń aqpan aıynda Astana qalasynda ótkizilsin degen sheshim qabyldandy.
Jaqsybaı SAMRAT,
«Egemen Qazaqstan»