Astanada Qazaqstan halqy Assambleıasynyń «Myń bala» respýblıkalyq mádenı-aǵartýshylyq jobasynyń jeńimpazdaryn marapattaý rásimi ótti. Saltanatty sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi L.Prokopenko, Parlament Májilisiniń depýtattary, shyǵarmashylyq jáne ǵylymı zııaly qaýym ókilderi, etnoaǵartý keshenderiniń ádiskerleri jáne jastar uıymdarynyń belsendileri qatysty.
Saltanatty is-shara Qazaqstan halqy Assambleıasy Tóraǵasynyń orynbasary – Hatshylyq meńgerýshisi L.Prokopenkonyń quttyqtaý sózimen ashyldy.
– «Myń bala» jobasy 2015 jyldan beri Qazaqstan halqy Assambleıasynyń bastamasymen «Qazaqtaný» jalpyulttyq jobasy aıasynda uıymdastyrylyp keledi. Búginde bul joba ártúrli ult ókilderiniń jastaryna qazaq halqynyń dástúrin, mádenıetin jáne tilin úıretýge arnalǵan jaqsy bastamaǵa aınaldy. Memlekettik til – bul joǵary jetistikterge umtylatyn, tabysty mansabyn quratyn jastarǵa arnalǵan «áleýmettik lıft», – dedi ol.
Jobaǵa qatysýshylardyń sany jyl saıyn artyp keledi. 2017 jyly baıqaýǵa 252 myń bala qatysqan bolsa, bıyl 271 myń oqýshy qatysty. Úmitkerler baıqaý talaptaryna sáıkes esse, shyǵarma, dıktant jazý jáne sheshendik sheberlikterin kórsetý boıynsha jarysqa tústi. Marapattaý saltanatyna elimizdiń barlyq óńirinen 48 oqýshy men oqytýshy keldi.
Leonıd Prokopenko joba jeńimpazdarynyń arasynda Qazaqstannyń bolashaq mınıstrleri, ákimderi, jýrnalısteri, dıplomattary men dárigerleri bar ekenine senim bildirdi.
– Sizderdiń búgingi jobadaǵy tabystaryńyz – bul búkil Qazaqstannyń tabysy. Qazaq tili men týǵan jerge degen yqylastaryńyz úshin shyn júrekten alǵysymdy bildirgim keledi, – dedi Assambleıa Tóraǵasynyń orynbasary.
Úzdik esse, beınerolıkter avtorlaryna Qazaqstan halqy Assambleıasynyń marapattary men estelik syılyqtary saltanatty túrde tabystaldy. «Asyl sóz» mektebi nomınasııasy boıynsha – 18, «Erkin sóıle» – beınerolıkter estafetasy» nomınasııasy boıynsha – 13, «Til mektebi» nomınasııasy boıynsha 16 jeńimpaz marapattaldy.
Marjan TILEÝBEK,
«Egemen Qazaqstan»