Jazýshy-jýrnalıst Qaınar Oljaı ótken ǵasyrdyń toqsanynshy jyldarynyń ortasynda jaryq kórgen «Prezıdent pyraǵy» atty reportajdar kitabynda, Memleket basshysy Nursultan Nazarbaevtyń 1993 jyly qazan aıynda Mońǵolııaǵa barǵan resmı sapary jaıly kórgen-bilgenin baıandaı otyryp: «Prezıdent Nursultan Nazarbaev ózekti máselelerdi sheship alǵan soń osy eldegi qazaqtarmen kezdesip, atamekende bolyp jatqan ózgeristerdi, jańalyqtardy aıtty. ...Kezdesýden keıin Baı-ólke aımaǵynyń basshysy Mızamhan Kúntýǵanuly bastaǵan azamattar Qazaqstan delegasııasyna qonaqasy berýdi paryz sanapty. Olar «Kók táńir» rezıdensııasy ishine on eki qanat kıiz úı tigipti. Sol jerde úkili dombyrasyn qolǵa alyp, ózi de úlbirep turǵan Merýesh Bashaı degen qaryndasymyz Qazaqstan Prezıdentine arnaý aıtty. Atajurttan alysta jatqan bulardyń saǵynyshy, ańsaýy, óksigi, ókinishi, úmiti, bolashaǵy jatqan bul arnaýdyń jóni bólek boldy. Naz da bar, bazyna da bar. Tilek te bar, qaısarlyq ta bar. Aqboz úıdiń aldynda arnaýdy tyńdap turyp, Prezıdent Nursultan Nazarbaev tolqydy. Buǵan deıingi talaı saparda bul kisi tańdanysyn da, tolqynysyn da baıqatpaıtyn» dep jazypty.
Jýrnalıst jazǵan bul sátti ol kezde teleekrannan bárimiz de kórdik. Tipti Nursultan Ábishuly arnaýdy tyńdap turyp kóz jasyn súrtkenin bylaıǵy jurt áli umyta qoıǵan joq. Rasynda aqqýdyń balapanyndaı úkisi jelbiregen jas qyzdyń «Qandy buǵaý qaqyrap, Qaıta oraldy kók týym, Alystaǵy aǵaıyn, Kelshi degen jetti úniń...» deıtin zarly tolǵaýyn beıjaı tyńdaý múmkin emes-tin.
Odan beri qanshama jyldar almasty. Táı-táı basyp táýelsizdigin jarııalaǵan Qazaqstan qazir álemdegi aldyńǵy qatarly elge, Hanǵaıdaǵy qandasyna qamyǵa qaraǵan Elbasy qazir ǵalam tanyǵan tulǵaǵa aınaldy.
Arada 15 jyl ótkende, ıaǵnı 2008 jyly Elbasy Nursultan Nazarbaev taǵy da kezekti ret resmı saparmen Mońǵolııaǵa bardy. Taǵy sol Ulan-batyr qalasynda qandastarymen kezdesti. Osy qaýyshý ústinde on bes jyl buryn Elbasyny jyrymen eljiretken ánshi Merýesh án saldy. Bul joly ertedegideı zarly suńqyl emes, 10 jyldyń ishinde irgesi keńeıgen alyp shahar Astana jaıly, damýdyń dańǵyl jolyna túsken Qazaqstannyń búgini men bolashaǵy jaıly shattyq jyry jyrlandy.
Kezdesý ústinde Nursultan Ábishuly ánshi qaryndasymyzǵa «Atajurtqa oralmaısyń ba?» degen saýal tastap, Merýeshtiń «ıá» degen jaýabyn estigennen keıin mezette qyzmet babymen birge barǵan adamdarǵa «Qaraǵandy oblysy ákimine habarlasyńdar, Merýeshti jumysqa qabyldasyn!» dep qolma-qol tapsyrma bergizdi. Sóıtip, ánshi qyzymyz atajurtyna oralyp, qazir Q.Baıjanov atyndaǵy Qaraǵandy oblystyq konserttik birlestiginde abyroıly qyzmet atqaryp júr.
Beken QAIRATULY,
«Egemen Qazaqstan»