Astana qalasynyń turǵyny Samǵaý Násiphan deıtin baýyrymyz bar. Osy jigit asa bir rıza keıippen: «Men Elbasynyń iltıpatyna bólengen adammyn» degendi únemi aıtyp júredi. Rasynda solaı. Samǵaýdyń týǵan jeri – Shyńjań ólkesine qarasty Altaı aımaǵy, sonyń ishinde elimizdiń shyǵys shekarasymen irge ushtasyp jatqan Qaba-Býyrshyn aýdany. О́ziniń aıtýynsha, ata-anasy aýyldyń qarapaıym da, qarajon adamdary bolypty. Biraq naǵashysy óńirge ónerimen tanylǵan sheber eken.
«Aldaý qospaı adal eńbegin satqan qolónerli – qazaqtyń áýlıesi» dep Abaı atamyz aıtqandaı, Samǵaý naǵashysynan etik tigýdiń qyr-syryn jastaı úırengen. Qysqasy, qazaqtyń kókqasqa etigin kókteı jórmep, kónteriden sirókshe salyp, bylǵarydan oımyshty qalyń qonysh qondyryp, etik tigýdi meńgergen jigit 2005 jyly Altaı asyp, atajurtyna oralǵan. Kele sala atakásibin qolǵa alǵan. Biraq shalǵaı aýyldyń sharqy belgili, ónimi óte qoımaǵan soń, 2010 jyly elordaǵa kelip, etik tigýdi bastap ketken.
– 2015 jyly edi, – deıdi Samǵaý inimiz. – Qolyma qymbat qoltyraýynnyń terisi tústi. Ony basqaǵa qımaı bar qazaqtyń basyn qosyp, baǵyn ashqan Nursultan aǵama arnap etik tigýge bel baıladym. Etik tigilip bitken soń ony Nursultan Ábishulyna joldap, onymen qoımaı 2012 jyldan beri úzbeı toılanyp kele jatqan 1 jeltoqsan – Qazaqstan Respýblıkasynyń Tuńǵysh Prezıdenti kúnimen quttyqtadym. Arada kóp ýaqyt ótken joq, Memleket basshysy Nursultan Nazarbaevtyń qarapaıym etikshi-oralman meniń atyma joldaǵan iltıpat haty kelip jetti.
О́zderińiz kórip otyrǵandaı, Elbasy óziniń iltıpat hatynda: Samǵaý baýyrymyz jibergen syılyqty qabyl alǵanyn aıtyp, syrtta júrgen aǵaıyndar atajurtqa oralyp, oryn tapqandaryna qýanyshty ekenin jetkize kele, munyń bári táýelsizdiktiń arqasy ekenin erekshe eskertip, syılyq ıesine baq-bereke tilep, hattyń sońyna «2 jeltoqsan, 2015 j.» degen datamen qatar óziniń qolyn qoıypty.
Atam qazaq «jaqsynyń sharapaty – táńirdiń rahaty» degenindeı, osy oqıǵadan keıin oralman baýyrymyzdyń kásibine keń jol ashylǵan. Qazirgi tańda Samǵaý Násiphanulyna elimizdegi «О́ńirlerdi damytý» baǵdarlamasy boıynsha elorda irgesindegi Qaraótkel aýylynan 20 sotyq jer telimi berilip, oǵan kásipker azamat jeńil aıaq kıim óndiretin shaǵyn kásiporyn salyp jatyr. «Buıyrsa, aldaǵy jyldyń aıaǵyna taman óndiristi iske qosamyz» deıdi Samǵaý inimiz.
Beken QAIRATULY,
«Egemen Qazaqstan»