Nursultan Nazarbaev «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestiginiń tárbıelenýshilerimen kezdesti.
Memleket basshysy ulttyq áskerı-patrıottyq ortalyqqa baryp, «Otan, Elbasy, Jas sarbaz» atty merekelik is-sharaǵa qatysty, sondaı-aq balalar men jasóspirimder áskerı-patrıottyq qozǵalysynyń tárbıelenýshilerimen kezdesti.
Elbasy is-shara bastalar aldynda áskerı-patrıottyq ortalyq mýzeıiniń ekspozısııalarymen tanysty. Onda Qazaqstan armııasyna arnalǵan áskerı sýretshiler stýdııasynyń týyndylary men «Orbulaq shaıqasynyń» dıoramasy qoıylǵan, sonymen qatar 3D-mapping shoý tehnologııasyn qoldana otyryp, proeksııalyq kórme uıymdastyrylǵan.
Qazaqstan Prezıdenti sharaǵa qatysýshylardyń bárin óskeleń urpaqty otanshyldyqqa tárbıeleıtin «Jas sarbaz» qozǵalysynyń qurylýymen quttyqtady. Osyǵan oraı, Memleket basshysy ulttyq rýhty qalyptastyryp, el tarıhyn tereń zertteýdiń mańyzdylyǵyn aıryqsha atap ótti.
– Jaqynda jarııalanǵan Joldaýdaǵy mańyzdy máselelerdiń biri – patrıottyq tárbıe berý isi. Eger biz Otanymyzdy qorǵaı almasaq, onda táýelsizdiktiń 27 jyly ishinde atqarǵan barlyq jumysymyzdyń máni joǵalady, – dedi Nursultan Nazarbaev.
Elbasy búginde memleket tarapynan atqarylyp jatqan sharalardyń bári keler urpaq úshin jaqsy jaǵdaı jasaýǵa baǵyttalǵanyn aıtty.
– Osynyń bári jastarymyz – bizdiń bolashaǵymyz úshin. Atqarylyp jatqan jumystardyń bári sizderdiń ómirlerińizdi odan saıyn jaqsartyp, Qazaqstanymyzdy odan ári baıyta túsý úshin jasalýda, – dedi Memleket basshysy.
Nursultan Nazarbaev elimizdiń barlyq jastaryn «Jas sarbaz» qozǵalysy múshesiniń qataryna qosylýǵa shaqyrdy.
– «Jas sarbaz» qozǵalysy elimizdiń barlyq óńirinde qurylýǵa tıis. Jastar osy qozǵalystyń qatarynan tabylýy qajet. Sondyqtan, dene shynyqtyrýmen aınalysyp, áskerı mamandyqtardy ıgergen jón. Bul qozǵalys Qorǵanys mınıstrligimen birlesip, patrıottar tárbıeleý isine belsendi atsalysýy kerek. Sonda ǵana sizder óz halqyńyzdyń tiregine aınalasyzdar, – dedi Qazaqstan Prezıdenti.
Memleket basshysy «Uly dalanyń jeti qyry» atty maqalanyń qazaqstandyq patrıotızmdi kúsheıtý isindegi erekshe mańyzyn aıtty.
Nursultan Nazarbaev Qazaqstan qoǵamynyń gúldenýi úshin turaqtylyq pen ultaralyq kelisimdi saqtaýdyń mańyzdylyǵyn atap ótti.
– Elimizde kóptegen etnos ókilderi turady. Biz bárimiz de – Qazaqstan azamattarymyz. Baı tarıhymyzdyń arqasynda tózimdilik pen qurmetteýdi boıymyzǵa sińirdik. Bul qundylyqtar Qazaqstandy biriktiredi, memleketti qýatty jáne syıly memleketke aınaldyrady. Sondyqtan Otanymyzdyń patrıoty bolý – barshamyzdyń paryzymyz, – dedi Qazaqstan Prezıdenti.
Sońynda Memleket basshysy barlyq qatysýshylarǵa tabys pen jańa jetistikter tiledi.