Aqtaý qalasyndaǵy hımııa-bıologııa baǵytyndaǵy Nazarbaev Zııatkerlik mektebiniń oqýshylary men ata-analary qala ortalyǵyndaǵy «Dına» gıpermarketinde QR Tuńǵysh Prezıdenti kúnine oraı respýblıkada bir mezette uıymdastyrylatyn «Uly Dala muragerleri» dombyrashylar fleshmobyn ótkizdi. Dástúrli aksııa, sonymen qatar, «Nazarbaev Zııatkerlik mektepteri» derbes bilim berý uıymynyń 10 jyldyq mereıtoıyna arnaldy.
Sharanyń basty maqsaty – respýblıkadaǵy zııatkerlik mektep oqýshylarynyń yntymaqtastyǵyn arttyryp, olardyń ónerin kópshilikke dáripteý, jergilikti halyqqa qazaq kúıleriniń kúmbirin estirtý. Aksııaǵa qatysýshylar «Erke sylqym», «Saryarqa», «Balbyraýyn», «Adaı» jáne «Ata tolǵaýy» kúılerin tartty. Fleshmobqa bıyl 30-dan asa dombyrashy qatysty.
-Zııatkerlik mektep oqýshylary QR Tuńǵysh Prezıdenti kúni qarsańynda uıymdastyrylatyn atalǵan aksııaǵa jyl saıyn belsendi qatysady. Qazaqtyń kúılerin tartyp, ánderin aıtady. Sharaǵa mektebimizdiń dombyra úıirmesiniń oqýshylary óz ónerlerin kórsetedi. Qazaqtyń ulttyq aspaby dombyrada oınaýshylardyń qatary jyl saıyn artyp keledi. Bul, árıne qýanarlyq jaǵdaı, deıdi mektep dırektorynyń tárbıe isi jónindegi orynbasary Altynzer Ihsanova.
Bıylǵy fleshmobtyń ereksheligi oqýshylarmen qatar, ata-analardyń qatysýynda. Olar balalarmen kúı tartyp, respýblıkalyq masshtabtaǵy aksııaǵa eleýli úles qosty.
-Búgingi jas dombyrashylardyń aksııasy ulttyq aspabymyz dombyranyń qońyr daýysyn rahattana tyńdaýǵa múmkindik berdi. Zııatkerlik mektep oqýshylarynyń óneri órge júzsin! Barsha qazaqstandyqtardy QR Tuńǵysh Prezıdenti kúnimen quttyqtaımyn!- deıdi Tamara Dúısenova.
Aıta keteıik, «Nazarbaev Zııatkerlik mektepteri» derbes bilim berý uıymynyń avtorlyq aksııasyna bıyl 1500-den asa dombyrashy qatysty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy