Oblystyq analar keńesi Tuńǵysh Prezıdent kúnine arnap «Elbasy anasy úlgi bolar barshaǵa» atty taǵylymdy jıyn ótkizdi.
Analar keńesiniń tóraıymy Kúlimkóz Smaılova óz sózinde «er eldi qorǵaıdy, el jerdi qoǵaıdy» degen qazaqtyń qanatty sózin keltire otyryp, otbasydaǵy ata-ana tárbıesine, jaýapkershiligine toqtaldy. Balanyń bir sózdi, er minezdi, eńbekqqor da kópshil bolyp ósýindegi otbasy, oshaq qasy qamqorshysy, jylytýshysy ananyńróline, tálim-tárbıesine kóp baılanysty ekenin, ony Táýelsiz Qazaqstannyń Tuńǵysh Prezıdenti Nursultan Ábishuly Nazarbaevtyń ómirinen kórýge bolatynyn atap kórsetti.
Túrik etnomádenı birlestigi tóraǵasynyń orynbasary Dılıara Hasanova , polısııa qyzmetkeri Maqpal Sársenqyzy otbasynyń uıtqysy, berekesi, meıirim-shapaǵat kózi bola bilgen Áljan anamyzdyń berekeli shańyraqtyń tuńǵyshyn maqsat-muratyna jetkizý, ata-baba jolymen tektilikke tárbıeleý jolyndaǵy janqııarlyq eńbegi, meıirim-shapaǵaty, súıispenshiligi men qamqory, ulynyń janyn qas-qabaǵynan, janarynan tanyǵan baıqaǵysh qasıetteri jaıly tebirene áńgimeledi. Sapýra qajy Táshenovanyń izettilikke shaqyrǵan oılary bir shańyraq astynda tatý-tátti otbasy yntymaǵyn, báriniń babyn taýyp, qanatymen sý sebelegen qarlyǵash qusap tatý-tátti, yntymaq ortany qalyptastyra bilgen, ul-qyzdaryn ımandylyqqa, meıirimdilikke baýlýda ulttyq qundylyqtardy ustanǵan Ana degen uly uǵymnyń túp-túp tamyrynan tereń oı sabaqtap, qyz-kelinshekterge Áljan ana taǵylymy úlken úlgi-ónege ekenin, dástúrdi syılap, tereń sezinip ósken bala Elbasy sııaqty el, jer, otan qorǵany bolyp ósetinin jetkizdi.
Analar keńesiniń múshesi, psıholog Irına Iаkımova ataqty tulǵanyń týǵan jerin, ósip-óngen ortasyn, otbasyn, bylaısha aıtqanda, geneologııalyq dińgegin bilý jastar úshin umytylmas sabaq ekenin aıta kelip, balalarynyń ómirden óz ornyn tabýdy qalaǵan, sol maqsat-murat jolyndaǵy Áljandaı áz analardyń rólin «jumaq áıeldiń aıaǵynyń astynda» degen qanatty sózben salystyrdy. Er azamat-túzdiń adamy bolsa, negizgi tárbıege áıelge júktelgenin naqty mysaldarmen sabaqtady.
Este qalar keshte Tuńǵysh Prezıdent kúni týǵan 14 balaqaıǵa zor qurmet kórsetilip, eldi, jerdi qorǵaı biletin qaısar azamat bolyp ósińder degen tilekpen yrymdap árqaısysynyń qolyna qamshy ustatty. Kóp bala ósirip, otbasynyń yrysyn, shýaǵyn keltirip otyrǵan bir top aq jaýlyqty analarǵa arnaıy syı-sııapattar jasaldy.
О́mir ESQALI,
«Egemen Qazaqstan»
Soltústik Qazaqstan oblysy