«Nazarbaev Zııatkerlik mektepteri» derbes bilim berý uıymynyń 10 jyldyǵyna arnalǵan «Uly dala muragerleri» atty oqýshylar men pedagogtardyń forýmy bastaldy.
«Bul álemdegi órkenıettiń ónegesin ustanǵan bilim oshaqtarynyń berekeli belesi. Nazarbaev ýnıversıteti qurylǵannan keıin bul ýnıversıtetke túsetin stýdentter qajet boldy. Alaıda bul ýnıversıtetke túsýdiń talaby men suranysy óte joǵary boldy. Sondyqtan men Qazaqstannyń ár túkpirinde osyndaı zııatkerlik mektepter ashýdy qolǵa aldym. Mine, búgin sol zııatkerlik mektepterdiń 10 jyldyǵyn atap otyrmyz. Búginde zııatkerlik mektepter elimizdegi orta bilim berýdiń eń joǵarǵy etalonyna aınaldy. Qazirgi kezde qazaqstandyq ózge mektepter osy zııatkerlik mektepterge qarap boı túzeıdi», dedi Elbasy saltanatty sharanyń ashylýynda.
Sondaı-aq Memleket basshysy jas urpaqtyń zaman talabyna saı bolýy onyń bazalyq bilimine tikeleı baılanysty ekenin atap ótti. Jıynda belgili bolǵandaı, Qazaqstannyń barlyq óńirinde ashylǵan 20 zııatkerlik mektepte búginge deıin 8000 túlek bitirip shyqqan.
«Zııatkerlik mektepterdegi bilim sapasyn sheteldik muǵalimder men professorlar maquldap otyr. Bul oqytý júıesi Sıngapýr men Ulybrıtanııa syndy elderdiń úzdik standarttarymen teń keledi. Álemniń bedeldi ýnıversıtetteri bizdiń túlekterimizdi tańdaýy sonyń aıqyn dáleli», dedi N.Nazarbaev.
Forým barysynda «Sandyq Qazaqstanǵa qosqan úlesimiz» degen taqyrypta arnaıy stend uıymdastyrylady. Onda jańa talapqa beıimdelip jasalǵan oqýlyqtar, el muǵalimderine arnalǵan júıeli jáne ádistemelik keshen, vırtýaldy ǵylymı zerthanalar, Zııatkerlik mektepterdiń oqýshylary ázirlegen «Kazakh – Latin Converter», «Physics Helper» mobıldi qosymshalary qoıylyp, kópshiliktiń nazaryna usynylady.
Sondaı-aq halyqaralyq yntymaqtastyqqa arnalǵan stend ornalastyrylyp, oǵan Zııatkerlik mektepterdiń strategııalyq seriktestikteriniń ókilderi qatysady. Olardyń qatarynda CIS Halyqaralyq Mektepter keńesi, Kembrıdj ýnıversıteti, Cito Pedagogıkalyq ólsheýler ortalyǵy, Halyqaralyq bakalavrıat júıesi jáne taǵy basqalary bar.
Is-shara barysynda «Nazarbaev Zııatkerlik mektepteri» oqýshylarynyń halyqaralyq baıqaýlarda júldeli oryndarǵa ıe bolǵan ǵylymı jobalar kórmesi ótedi. Budan ári zııatkerlik mektepterdiń oqýshylary «Uly dala muragerleri» atty teatrlyndarylǵan qoıylym qoıyp, onda áleýmettik jobalardyń qorytyndylary men tájirıbeleri týraly oqıǵalar jelisin baıandaıdy. Naqtyraq aıtqanda, elimizdiń tarıhy men mádenıetin zertteýge baǵyttalǵan – «Týǵan elge taǵzym», «Júz kúıdiń tarıhy», «Eki apta aýylda», «Qazaqtyń 100 áni», «100 kitap» jáne basqa da jobalardy qamtıdy.
Forýmǵa 1000-nan astam adam qatysady. Olardyn qatarynda Joǵary qamqorshylyq keńestiń músheleri, qoǵam qaıratkerleri, elshiler, sheteldik seriktester, halyqaralyq uıymdardyń ókilderi, bıznesmender, jýrnalıster, sportshylar, muǵalimder, Zııatkerlik mektepterdiń oqýshylary men túlekteri bar.