Qazaqstan Prezıdenti «Nazarbaev Zııatkerlik mektepteri» derbes bilim berý uıymynyń 10 jyldyǵyna arnalǵan «Uly dala muragerleri» atty forýmǵa qatysty.
Elbasy forým bastalar aldynda Nazarbaev Zııatkerlik mektepteri oqýshylarynyń ǵylymı jobalary qoıylǵan kórmeni aralap kórip, osy bilim berý uıymdaryn odan ári damytý strategııasy jónindegi baıandamany tyńdady.
Nursultan Nazarbaev sóılegen sózinde forýmǵa qatysýshylardyń bárin zııatkerlik mektepterdiń 10 jyldyq mereıtoıymen quttyqtap, bul mektepter elimizdiń bilim berý júıesinde erekshe oryn alatynyn atap ótti.
– Zııatkerlik mektepter memleketimizdegi orta bilim berý júıesiniń etalonyna aınaldy. Búginde Qazaqstannyń barlyq mektepteri sizderge qarap boı túzeıdi. О́skeleń urpaqtyń qazirgi zamanǵy talaptarǵa saı bolýy bazalyq bilimmen tikeleı baılanysty, – dedi Memleket basshysy.
Qazaqstan Prezıdenti óńirlerde ashylǵan 20 zııatkerlik mektepti qazirgi kezde 8 myńnan astam oqýshy bitirip shyqqanyn aıtty.
– Elimizdegi árbir daryndy balanyń álemniń úzdik standarttary boıynsha bilim alýyna múmkindik týǵyzý biz úshin mańyzdy boldy. Onyń basty qaǵıdattary – oqý úderisiniń júıeliligi, maqsattardyń aıqyndyǵy jáne tájirıbe júzinde oqytý, – dedi Elbasy.
Memleket basshysy bilim berýdiń ozyq ádistemelerin jáne irikteýdiń qatań júıesin engizý nátıjesinde Nazarbaev Zııatkerlik mektepteriniń oqýshylary matematıkalyq saýattylyq boıynsha álemniń úzdik 10 eliniń oqýshylarynyń qataryna qosylǵanyn atap ótti.
– Búginde munda elimizdiń barlyq óńirinen kelgen balalar bilim alýda. Solardyń 3 myńnan astamy – kóp balaly jáne turmysy tómen otbasylardyń balalary bolsa, 2,5 myńy – aýyldyq jerler men shaǵyn qalalardan kelgen oqýshylar. Bul – áleýmettik ádilettilik pen talantty ár balanyń ózin-ózi tanytýǵa jasalǵan múmkindiktiń naqty kórsetkishi, – dedi Nursultan Nazarbaev.
Sonymen qatar, Qazaqstan Prezıdenti zııatkerlik mektepterdi ilgeriletýdiń oń qarqynyn saqtap, olardy odan ári damytýdyń jańa baǵyttaryn aıqyndaý qajettigine nazar aýdardy.
– Qazirdiń ózinde sıfrlyq tehnologııalar, bıoınjenerııa jáne robottandyrý salalarynda jumys isteı alatyn jańa mamandar qajet. Aldaǵy 10-15 jyl ishinde jasandy ıntellekt pen avtomattandyrý tehnologııalary ómirimizdiń ajyramas bóligine aınalady, – dedi Elbasy.
Sondaı-aq, Memleket basshysy ınnovasııalyq tehnologııalar engizý turǵysynan oqýshylardyń jańa kásipterge beıimdelýiniń mańyzdylyǵyna toqtaldy.
– Álem kún saıyn damyp keledi, únemi ınnovasııalyq jáne jańa dúnıeler paıda bolyp, ashylýda. Sondyqtan ómirdiń jyldam ózgerip jatqan talaptaryna saı bolý úshin sizderge zamanaýı tehnologııalardy meńgerý qajet, – dedi Nursultan Nazarbaev.
Budan bólek, Qazaqstan Prezıdenti oqýshylardyń STEAM-daıyndyǵyn kúsheıtip, alǵan bilimderin jobalyq jáne zertteý jumystaryn oryndaý arqyly tájirıbede júzinde qoldanýdy qamtamyz etýdiń mańyzdylyǵyn aıtty.
– Aǵylshyn tilinen aýdarǵanda, STEAM degenimiz – bul jaratylystaný ǵylymdary, tehnologııalar, ınjenerııa, óner jáne matematıka. Bir sózben aıtqanda, qazirgi zamanda suranysqa ıe bolyp kele jatqan pánder. Mundaı pánaralyq jáne qoldanbaly ádisti qoldaný balalardy synı oılaýǵa úıretedi. Sonyń arqasynda jańashyldar men ónertapqyshtardyń jańa býyny qalyptasady, – dedi Elbasy.
Memleket basshysy tórtinshi baǵyt retinde shet tilderdi meńgerýdiń mańyzdylyǵyn atap ótti.
– Bıylǵy oqý jylynda zııatkerlik mektepterde oqýshylardyń tańdaýy boıynsha ekinshi shet tilin meńgerý isi qolǵa alyndy. Jahandaný jaǵdaıynda shet tilderin bilýdiń mańyzy asa zor. Tilderdi bilý basqa elderdegi adamdardyń mentalıteti men mádenıetin túsinýge jol ashyp, joǵary bilim alý jáne jumysqa ornalasý barysynda tańdaý jasaý aıasyn keńeıtýge múmkindik beredi, – Nursultan Nazarbaev.
Qazaqstan Prezıdenti oqýshylardyń emosııalyq ıntellektisin damytý máselelerine toqtaldy.
– Emosııalyq ıntellekt qazirgi zamanda básekege qabiletti tulǵanyń mańyzdy qasıeti sanalady. Aıasy tar tehnıkalyq quzyrettilikterge qaraǵanda, adamdardy sendire alý, olarǵa janashyrlyqpen qarap, tyńdaı bilý, tizimdilik tanytý qabiletteri suranysqa kóbirek ıe bolady, – dedi Elbasy.
Sońynda Memleket basshysy zııatkerlik mektepterdiń 10 jyldyq mereıtoıy elimizdiń órkendeýi jolynda damýdyń jáne aldaǵy zor jetistikterdiń jańa kezeńiniń bastaýy bolatynyna senim bildirdi.
– Qazirgi kezde tereń bilim alý, shet tilderin jáne zamanaýı tehnologııalardy meńgerý bárimizdiń basty mindetimiz bolýǵa tıis. Sizder sonda ǵana alǵa qoıǵan maqsattarǵa qol jetkizip, bıik belesterdi baǵyndyra alasyzdar, – dedi Nursultan Nazarbaev.