Tuńǵysh Prezıdent kúni merekesi qarsańynda О́skemendegi Ana men bala ortalyǵynyń 21 jas dárigerine «Qazsınk» kompanııasy 150 myń teńge kólemindegi kótermeaqynyń sertıfıkattaryn tabys etti.
«Ana men balaǵa qamqorlyq – qoǵamǵa qamqorlyq. Bul iske barlyǵymyz atsalysýǵa tıispiz. Biz múmkindigimizshe oblys dárigerleriniń elimizde jáne shet elde bilim alýyna, emhanalardy jańa medısınalyq quraldarmen jabdyqtaýǵa qarjylaı qoldaý kórsetip kelemiz. Bul joly kompanııa jas dárigerlerdi qoldaýǵa nazar aýdaryp otyr. Jas mamandar aǵa býynnan ónege alyp, tájirıbe jınaqtaıdy dep senemiz», - deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
Saltanatty sharada oblystyq densaýlyq saqtaý basqarmasynyń basshysy Marat Shoranov Elbasy Nursultan Nazarbaev densaýlyq salasyna erekshe kóńil bóletinin, óńirimizde oblys ákiminiń bastamasymen dárigerler tapshylyǵy máselesin sheshýge basa mán berilgenin, jaqyn ýaqytta jas mamandar qyzmettik pátermen qamtylatynyn atap ótti. «Memleketten bólek bıznes ókilderi, onyń ishinde «Qazsınk» kompanııasy oblystyń densaýlyq salasyna járdemdesip turady. Jýyqta kompanııanyń basqa da bastamalaryn talqyladyq, aldaǵy ýaqytta sátimen júzege asar dep oılaımyz», - deıdi basqarma basshysy.
Reti kelgende aıta keteıik, óndiris orny 21 jyldan beri aımaqtaǵy medısınalyq mekemelerge qol ushyn sozyp keledi. Bıyl kompanııa Ana men bala ortalyǵyna náreste boıyndaǵy aýrý belgilerin erte anyqtaýǵa múmkindik beretin oftalmologııalyq apparat alyp beripti. Buǵan deıin mundaı qurylǵy Astana, Almaty jáne Shymkent qalalarynda bolypty. Sonymen qatar kásiporyn kómegimen Altaı aýdanyndaǵy aýdandyq aýrýhananyń shatyry aýystyrylyp, Rıdderdegi qalalyq emhanaǵa jóndeý júrgizilipti.
Azamat QASYM,
«Egemen Qazaqstan»
О́SKEMEN