Orynborda týyp-ósken qandasymyz Damır Ismaǵulov erejesiz jekpe-jek álemindegi eń beldi uıym – UFC-degi óziniń tusaýkeser kezdesýin jeńispen aıaqtady.
Adelaıda qalasynda ótken básekege ol qazaqtyń ánimen jáne Qazaqstan men Reseıdiń týyn ustap shyqty. Osy kúnge deıin alty jekpe-jek ótkizip, barlyǵynda jeńiske jetken jergilikti sportshyAleks Gordjeske qarsy kezdesý úsh raýndqa sozyldy. Básekeniń basynan aıaǵyna deıin óte saýatty qımyldaǵan Damır kúmánsiz jeńiske jetti. Qandasymyz tik turyp aıqasqanda da, kúreste de qarsylasyna qaraǵanda áldeqaıda alymdy kórindi. Barlyq tóreshiler qazaqtyń qaısar ulynyń myqtylyǵyn biraýyzdan moıyndady. Esep – 30-25, 30-26 jáne 30-26.Osylaısha, Ismaǵulovtyń esimi álemdegi eń úzdik promoýshnde jeńiske jetken tuńǵysh qazaq sportshysy retinde tarıhta qaldy.
Jarys qarsańynda qobaljyǵanym ras. Qansha degenmen, bul – meniń UFC-degi tusaýkeser kezdesýim ǵoı. Bir apta boıy durys uıyqtaı almadym. Jergilikti aýa-raıyna da beıimdelý de ońaı bolmady. Soǵan qaramastan kózdegen maqsatyma qol jetkizdim. Osy jarys barysynda kóptegen adamdar «mynaý qaı eldiń týy?» dep surap jatty. Men keń baıtaq Qazaqstannyń baıraǵy dep aıttym. Eń bastysy, endi olar qazaqtyń jigitteri qanshalyqty qaıratty ekenin biletin bolady, – deıdi Damır.
Esterińizge sala keteıik, 27 jastaǵy Damır Ismaǵulovtyń osy sport túrin serik etkeli tórt jyldan endi asty. Sol ýaqyt aralyǵynda ol 19 márte aıqas alańyna shyǵyp, 17 ret jeńis toıyn toılady. 10 básekeni merziminen buryn aıaqtady. Qazaq sportshysy kezinde Reseıdiń M-1 Global nusqasy boıynsha chempıondyq belbeýdi ıelendi.
Ǵalym SÚLEIMEN,
«Egemen Qazaqstan»