Aqtóbede QR Tuńǵysh Prezıdenti kúnine arnalǵan basty merekelik jıyn «Máńgiligin mánerlegen Elbasy» atty taqyryppen ótkizildi. Saltanatty sharaǵa jınalǵan Aqtóbe aımaǵynyń jurtshylyǵy, memlekettik jáne úkimettik emes uıymdar men zııaly qaýym ókilderi eń aldymen Elbasy týraly túsirilgen «Darabozdardyń darasy» atty beınefılmdi kórip tamashalady. Budan keıin qoldaryna memlekettik rámizdiń biri – Tý kótergen jas sarbazdar men patrıottyq klýbtyń músheleri ortaǵa shyǵyp áskerı sappen alǵa attady.
1991 jyly 1 jeltoqsany... Bul egemen elimizdiń tarıhynda máńgi saqtalyp ári máńgi jattalyp qalatyn aıryqsha datalardyń biri. О́ıtkeni dál osy kúni eldiń tuńǵysh Prezıdentin saılaýǵa qatysqan qazaqstandyqtardyń 98 paıyzdan astamy N.Á.Nazarbaevty qoldap daýys berdi. Mine, sodan beri 27 jyl ótipti. Qazirgi tańda Qazaqstannyń ataq-dańqy búkil álemge jaıyldy. Eń bastysy kóp etnosty jas memlekette birlik pen kelisim, yntymaq pen yrys, baq pen bereke qaǵıdattary saltanat qura bastady. Bul oń nyshan men kórinis eń aldymen memleket basshysy N.Á.Nazarbaevtyń salıhaly syrtqy jáne ishki saıasatynyń arqasy, - dedi aqtóbelikterdi Tuńǵysh Prezıdent kúnimen quttyqtap sóz sóılegen Aqtóbe oblysynyń ákimi Berdibek Saparbaev.
Búgingi kúni elimiz álemdegi joǵary damyǵan elý eldiń qataryna kirý baǵytyn ustanyp otyr. Respýblıkadaǵy jetistikterdiń bári Prezıdenttiń kún-tún demeı óz halqynyń áleýmettik turmys-deńgeıin kóterý jolyndaǵy tókken teriniń arqasy. Elbasy elin súıse, eli Elbasyn súıedi. Barsha qazaqstandyqtardyń óz Elbasyna degen rızashylyǵy, yqylasy men alǵysy qashan da sheksiz. Sonyń basty bir aıǵaǵy barsha qazaqstandyqtardyń qoldaýy men 1 jeltoqsan Tuńǵysh Prezıdent kúni dep atalǵany. Osynaý dara data qazirgi kúni elimizde memlekettik mereke bolyp jarııalandy. Mereke qutty bolsyn dedi budan ári óńir basshysy.
Tuńǵysh Prezıdent kúni aıasyndaǵy basqosý kezin el baıtaǵy – Astananyń qalyptasýy men damýyna eleýli úles qosqan aqtóbelikterdiń úlken shoǵyryna «Astanaǵa – 20 jyl» merekelik medali tabys etildi. Týǵan eliniń ósip órkendeýine súbeli úlesin qosyp, múmkindigi shekteýli jandar men jetim balalarǵa qamqorlyq pen qoldaý kórsete bilgen kásipkerler men belgili azamattar ár túrli atalymdar boıynsha marapattarǵa ıe boldy. Shyraıy kirgen shara kezinde memlekettik rámizder, táýelsizdik jyldaryndaǵy jetistikter jáne Qazaqstannyń ózge memlekettermen dostyq qarym-qatynastary týraly beınefılmder kórsetildi. Budan keıingi kezekte jas ánshiler «Meniń Elbasy» ánin áýelete shyrqady. Sondaı-aq myń burala bılegen bıshilerdiń horeografııalyq qoıylymy da merekelik sharanyń sánin keltire tústi. Baqytty sát, áli baqytty shaq dep osyny aıtyńyz.
Temir QUSAIYN,
«Egemen Qazaqstan»
Aqtóbe