Elbasy Nursultan Nazarbaevtyń «Uly dalanyń jeti qyry» maqalasynda kórsetilgen qoǵam úshin mańyzdy qundylyqtardy júzege asyrý maqsatynda Mádenıet jáne sport mınıstrliginiń qoldaýymen Temirbek Júrgenov atyndaǵy qazaq ulttyq óner akademııasynyń shyǵarmashylyq ujymy Eýropanyń Polsha, Chehııa jáne Vengrııa Respýblıkalaryna arnaıy saparǵa shyqty.
Akademııanyń Baspasóz ortalyǵynan habarlaǵanyndaı, Polshanyń Frıderık Shopen atyndaǵy áýejaıda dombyra, qobyz jáne jetigen bir ýaqytta kúı oınady. Erekshe áýenge qulaq túrgen jolaýshylar qazaq ónerine tánti bolyp, úlken qoshemet kóresetti. Akademııa stýdentteriniń myń buralǵan ásem bıleri de kórermendiń ystyq yqylasyna bólindi. Áýejaıdaǵy esten ketpes konsertti Júrgenov atyndaǵy ulttyq óner akademııasynyń mýzykanttary qoıdy. Bul olardyń Qazaqstannyń Tuńǵysh Prezıdenti kúnine oraı sheteldikterge jasaǵan tosynsyıy boldy.
Polıak kórermeni Hanna «Maǵan mýzyka men bı óte qatty unady. Sizdiń eldiń mádenıeti men mýzykasy ádemi. Qazaqstanda bolǵan emespin. Biraq ondaı múmkindik týyp jatsa, qýana-qýana baramyn» degen lebizin bildirdi.
Sondaı-aq «Alataý» folklorlyq ansambli Varshavadaǵy Qazaqstan elshiliginiń uıymdastyrýymen bolǵan saltanatty jıynda halqymyzdyń ánderi men kúılerin, Eýropa elderiniń klassıkalyq shyǵarmalaryn oryndady. Merekelik-mádenı kósh Varshava saparynan Praga qalasynda jalǵasyp, artynsha 5 jeltoqsan kúni Býdapeshtte óz máresine jetedi.
Elvıra Serikqyzy,
«Egemen Qazaqstan»
ALMATY