Jýyrda Shymkent qalasy boıynsha Memlekettik kirister departamentiniń basshysy Nuralhan Kósherovtyń tóraǵalyq etýimen syrtqy ekonomıkalyq qyzmetke qatysýshylarǵa arnalǵan «Kedendik deklarasııalaýdyń keıbir erekshelikteri» taqyrybynda dóńgelek ústel ótti. Jıynǵa «Nur Otan» saıası partııasynyń Shymkent qalasy fılıaly, «Atameken» kásipkerler palatasynyń jaýaptylary qatysty.
Jıynda Memleket basshysy alǵan qoıǵan «Ult jospary – bes ınstıtýsıonaldyq reformany júzege asyrý jónindegi 100 naqty qadam» baǵdarlamasynda eksporttyq jáne ımporttyq keden rásimderinen ótý kezinde «bir tereze» qaǵıdasyn engizý aıtyldy. Sondaı-aq, elektrondy jarııa etý júıesin damytý (taýarlardy kedendik tazalaýǵa avtomattandyrylǵan júıeni engizý), eksport jáne ımport úshin qujattar sanyn jáne olardy óńdeý ýaqytyn qysqartý jaǵy sóz boldy.
Ult jospary men «Sıfrly Qazaqstan» baǵdarlamasyn júzege asyrý maqsatynda Qazaqstan Respýblıkasynyń «Qazaqstan Respýblıkasyndaǵy kedendik retteý týraly» kodeksimen Eýrazııalyq ekonomıkalyq odaqtyń keden shekarasy arqyly ótkiziletin taýarlarǵa deklarasııany usynýdy mindetti túrde elektrondyq túrde júzege asyrý qarastyrylǵan. Osy maqsatta «ASTANA-1» aqparattyq júıesi engizilip otyr.
Atalǵan júıeniń negizgi maqsaty – kedendik resimderdi jyldamdatý, syrtqy ekonomıkalyq qyzmetke qatysýshylardyń ýaqyttyq jáne qarjylaı shyǵyndaryn qysqartý, elektrondy deklarasııalaý júıesin engizý, qujattar sanynyń qysqarýyna múmkindik týǵyzý, aldyn ala aqparatty usyný jáne kedendik deklarasııany shyǵarý bolatyn. Bul eń bastysy, osy júıeni engizý arqyly keden organy men syrtqy ekonomıkalyq qyzmetke qatysýshylardyń tikeleı qatynasyn qysqartý arqyly sybaılas jemqorlyq kórinisterin azaıtýǵa múmkindik týdyrady.
Basqosý sońynda qatysýshylarǵa «ASTANA-1» aqparattyq júıesinde jumys jasaýdyń negizgi erekshelikteri, basshylardyń azamattardy qabyldaý kúni jáne keden beketteriniń baılanys nómirleri kórsetilgen broshıýralar taratyldy.
Nurshat TО́KEN,
«Egemen Qazaqstan»