Qazirgi kezeńde túrkitildes memleketter qarqyndy damyp kele jatyr jáne árqaısysy halyqaralyq arenada ózine laıyqty orynǵa ıe. Sol memleketterdiń biri, túrki áleminiń mańyzdy bóligi – Qazaqstan Respýblıkasy. Onyń ishki jáne syrtqy saıasatty júrgizýi, seriktestik qaǵıdalaryna shynaıy kózqarasy halyqaralyq bedeliniń zor ekenin kórsetedi. Aıta ketý kerek, Qazaqstannyń táýelsizdik jyldary qol jetkizgen barlyq jetistikteri Tuńǵysh Prezıdent Nursultan Nazarbaevtyń esimimen tyǵyz baılanysty.
Úsh jyl buryn, dálirek aıtqanda, 2015 jyldyń qyrkúıeginde Túrkitildes memleketter yntymaqtastyǵy keńesiniń Astanada ótken 5-shi sammıtine qatysqanym esimde. Dál sonda meniń túrki mádenıeti men murasy halyqaralyq qorynyń basshysy retindegi kandıdatýram bekitildi. Kelesi kúni biz Qazaq handyǵynyń 550 jyldyq mereıtoıyna qatystyq. Sol jerde men óz tarıhyn, ulttyq ereksheligin saqtaǵan, óz dástúrlerin maqtan tuta alatyn zamanaýı jáne qýatty Qazaqstandy kórdim.
Búginde túrki elderi memleketteri basshylarynyń arasynda óte tereń baýyrlastyq pen senimdi áriptestik bar ekendigin aıryqsha atap ótý kerek. О́z kezeginde memleket basshylarynyń berik birligi bizdiń týys halyqtarymyz arasyndaǵy ózara baılanysqa oń áserin tıgizýde. Túbi bir túrki baýyrlar arasyndaǵy bul yntymaqtastyq pen áriptestik aldaǵy ýaqytta odan ári nyǵaıa túsedi dep senemin.
Osy turǵyda Elbasy Nursultan Nazarbaev pen ázerbaıjan halqynyń ulttyq kóshbasshysy Geıdar Álıevtiń uzaq jyldardyń tezine tózip bergen aıryqsha dostyq qarym-qatynasta bolǵanyn aıta alamyn. Qýanatyn bir jaıt, osy dástúr qazir de jalǵasyn tabýda. Ázerbaıjan memleketiniń Prezıdenti Ilham Álıev pen Qazaqstan Respýblıkasynyń Prezıdenti Nursultan Nazarbaevtyń arasynda da óte jaqyn dostyq baılanys berik qalyptasqan.
Sonymen qatar Elbasy Nursultan Nazarbaevtyń bitimgershilik mıssııany tabysty atqaryp otyrǵanyn aıryqsha atap ótkim keledi. Kóptegen elder arasynda kelispeýshilikter týyndaǵan kezde, Qazaqstannyń dana ári kemeńger kóshbasshysyna júginedi. Osylaısha Nursultan Nazarbaevtyń basshylyǵyndaǵy Qazaqstan baısaldy saıasatymen álemdik qoǵamdastyqtyń senimine ıe bolyp, tatýlastyrý mıssııasyn nátıjeli júzege asyryp keledi.
Jaqynda Qazaqstan Prezıdenti Nursultan Nazarbaev túrki álemi úshin mańyzdy zor tarıhı sheshimder qabyldady. Atap aıtqanda, Qazaqstannyń latyn álipbıine ótýi baýyrlas elderimizdi burynǵydan da jaqyndastyra tússe, Túrkistanǵa oblys mártebesin berý túrki álemine erekshe serpin bergen jańalyq boldy. Sondaı-aq «Túrki áleminiń tulǵalary», «Túrki áleminiń qasıetti jerleri» sııaqty mańyzdy jobalarǵa bastamashy bolyp, baı mádenı muramyzdy, rýhanı baı qundylyqtarymyzdy bolashaq urpaqqa saqtaý jáne jetkizýde úlken mańyzdy qadamdar jasady.
Gıýnaı EFENDIEVA,
Túrki mádenıeti men murasy halyqaralyq qorynyń prezıdenti