Qazaqstan Ulttyq Olımpıadalyq komıteti jyldyń sporttyq oqıǵalaryn qorytyndylady, dep habarlaıdy olympic.kz.
Ulttyq sporttyq júlde-2018 marapattaý rásimine tanymal sportshylar men jas chempıondar, el sportyna eńbegi sińgen ardagerler men sport salasyn basqaratyn tulǵalar jınaldy.
Jyl saıynǵy dástúr boıynsha, jankúıerler júlde laýreattaryn toǵyz atalym boıynsha Olympic.kz saıtynda daýys berý arqyly anyqtady.
Aıta ketelik, bıyl ótinimder ulttyq federasııalardan qabyldanyp, keıin UOK Sport dıreksııasy 2018 jylǵy Júlde úmitkerleriniń tizimin qurdy.
2018 jylǵy Ulttyq sporttyq júldeniń jeńimpazdary:
«Qysqy sport túrleri boıynsha úzdik sportshy» - Iýlııa Galysheva
«Jazǵy sport túrleri boıynsha úzdik sportshy» - Dmıtrıı Aleksanın
«Qysqy sport túrleri boıynsha úzdik bapker» - Elena Krýglyxına
«Jazǵy sport túrleri boıynsha úzdik bapker» - Álııa Iýsýpova
«Úzdik jas sportshy» - Bekarys Sádýaqas
«Jyldyń úzdik komandasy» - Sý dobynan erler komandasy
«Jyl jańalyǵy» - Gleb Brýsenskıı jáne Evgenıı Fedorov
«Olımpıadalyq sport túrleri boıynsha úzdik federasııa» - QR Ulttyq semserlesý federasııasy
«Úzdik aımaq» - Shymkent qalasy
Arnaıy músinshe barlyq jeńimpazdarǵa tabystaldy. Tek qysqy maýsymnyń bastalýyna baılanysty, 2018 jylǵy Olımpıadanyń qola júldegeri Iýlııa Galysheva saltanatty rásimge kele alǵan joq. Ol Fınlıandııanyń Rýka qalasynda jarysqa daıyndalyp jatyr. Sondaı-aq, Galyshevanyń jattyqtyrýshysy, frıstaıl-mogýldan bas bapker Elena Krgýlyhına da saltanatty sharaǵa qatysa almady.
Jeńimpazdarǵa júlde tabystaǵandar qatarynda beıbit zamannyń batyrlary da boldy. Atap aıtar bolsaq, mektepke deıingi jáne orta bilim berý júıesi boıynsha 2018 jyldyń úzdik muǵalimi Terdikbaı Kúsháı, qazaqstandyq výnderkınd, Nazarbaev Zııatkerlik mektebiniń 12-shi synyp oqýshysy Aqnazar Qajymurat jáne jas daryn, vırtýoz, kompozıtorlar men zamanaýı án oryndaýshylary halyqaralyq akademııasynyń eń jas qatysýshysy, 13 jasynda stýdent, 17 jasta magıstrant atanyp, 18 jasynda magıstrlik dıssertasııany sátti qorǵaǵan Rahat-Bı Ábdisaǵınder júlde tabystady.
Elimizdiń tanymal ári dańqty sportshylary men qaıratkerleri de nazardan tys qalǵan joq. Serik Qonaqbaev, Ivan Garanın, Ámın Tuıaqov, Olga Shıshıgına, Aleksandr Vınokýrov, Serik Sápıevter de júldeniń qurmetti qonaǵy atandy. Sondaı-aq, Mádenıet jáne sport mınıstri Arystanbek Muhamedıuly, Aqparat jáne kommýnıkasııalar mınıstri Dáýren Abaev jáne Qazaqstan UOK sporttaǵy áıelder jónindegi komıssııasynyń basshysy Úmit Shaıahmetova, Ońtústik Koreıanyń Qazaqstandaǵy elshisi Kım Desıkter laýreattarǵa kópten kútken júldeni tabys etti.
Ulttyq sporttyq júldeni tabystaý saltanatynyń telenusqasy 9 jáne 31 jeltoqsan kúnderi tıisinshe «Qazaqstan» jáne «Qazsport» arnalarynan kórsetiledi.