Astanadaǵy «Nomad» sport kesheninde Tuńǵysh Prezıdent kúnine oraı shaıbaly hokkeıden balalar men jasóspirimder arasyndaǵy týrnır óz máresine jetti.
Qazaqstan Respýblıkasy Bilim jáne ǵylym mınıstriligi kýbogy jolyndaǵy jarysta elimizdiń 12 oblysynan kelgen 24 komanda baq synady. Barlyǵy – 362 sportshy. Solardyń arasynan Astananyń qos komandasy sýyrylyp shyǵyp, fınaldyq saıysta bas júldeni ózara sarapqa saldy. Bul tartys «Barys barsy» klýbynyń paıdasyna sheshilse, «Astana 2010» ujymy kúmis medaldi ıelendi. Al kola júlde Petropavldyń «Qulagerine» buıyrdy.
Jarys qorytyndysy boıynsha jeńimpaz jáne júldeger atanǵan komandalarmen qatar, jekelegen atalmymdar boıynsha úzdik dep tanylǵan oıynshylar da arnaıy syılyqtarmen marapattaldy. Olar:
«Úzdik qaqpashy» – Arına Pavlovskaıa («Olımp», Aqtóbe)
«Úzdik qorǵaýshy» – Ánýar Murat («Raqymjan», Almaty)
«Úzdik shabýylshy» – Suhanberdi Rahmatýllaev («Turan», Shymkent)
«Úzdik mergen» – Aıbar Marat («Qaısar», Qyzylorda)
«Úzdik sheber oıynshy» – Gleb Iýgov («Qulager», Petropavl)
«Eń jas oıynshy» - Alen Grısenko («Olımp», Aqtóbe).
Jarystyń jabylý saltanatyna Bilim jáne ǵylym mınıstri Erlan Saǵadıev, aıtýly mınıstrliktiń baqylaý komıtetiniń tóraǵasy Talǵat Eshenqulov, Ulttyq ǵylymı-praktıkalyq dene tárbıesi ortalyǵynyń dırektory Sadyq Mustafaev, Áýesqoı hokkeı lıgasynyń uıymdastyrýshysy Ǵalym Nurjanov qatysyp, balǵyn hokkeıshiler arasyndaǵy osy týrnır endi ár jyl saıyn dástúrli túrde ótip turatynan málimdedi.
Ǵalym SÚLEIMEN,
«Egemen Qazaqstan»