Oblys ákimi Arhımed Muhambetov jyl saıynǵy dástúrmen mektep oqýshylarynyń olımpıadalarynda, shyǵarmashylyq baıqaýlar men sport jarystarynda jeńiske jetken úzdiktermen jáne olardyń jetekshilerimen, jattyqtyrýshylarymen kezdesti jáne jeńimpazdarǵa «Trıýmf» syılyǵyn tabys etti. Daryndy, qanatty jastar, olardyń tabystary bizdiń memlekettiń bolashaqqa salǵan ınvestısııasy bolyp tabylady. Elimiz Táýelsizdigi merekesi qarsańynda ótken saltanatty kezdesýde oblys ákimi Arhımed Muhambetov mektep oqýshylaryn ómirdegi alǵashqy tabystarymen qutyqtaı otyryp, oblys óńirinde jastar úshin jasalyp jatqan isterdi sholyp ótti.
«Jastar úshin sapaly bilim alý eń mańyzdy is. О́tken jyly oblys ákimdigi 200 oqý grantyn bóldi jáne aldaǵy ýaqytta 5 jataqhana salynatyn bolady. Onyń ekeýi 2019 jyly tapsyrylady. «Sıfrly Qazaqstan» baǵdarlamasy aıasynda oblysta IT lıseı ashyldy. Oǵan 200 mıllıon teńge qarjy bólindi. Oblystaǵy mektepterdi keń jolaqty ınternetpen qamtamasyz etý isi jalǵasyp jatyr. Búginde 504 mekteptiń 426-da, ıaǵnı 84 prosentinde keń jolaqty ınternet bar. 312 mektep Vaı-faımen jabdyqtaldy. Bul barlyq mekteptiń 62 prosenti degen sóz. Daryndy oqýshylar halyqaralyq dárejedegi bilim, shyǵarmashylyq baıqaýlardan, sport jarystarynan júldeli oryndar alyp kelip jatyr. Bul maqtanysh. Osyndaı tabysqa jetý úshin óńirde jastarǵa arnalǵan barlyq jaǵdaıdy jasaı beremiz» dedi Arhımed Begejanuly. Aldaǵy jyldy Elbıýasy Jastar jyly dep jarııalady. Oblysta kelesi jyly Jastar saraıy boı kóteretininen de oblys ákimi habardar etti.
Kezdesýde úzdik tabystarymen eldi syrtqa tanystyryp júrgen oqýshylar da sóz aldy. Aıan Moldaǵalıev sporttyq gımnastıkamen aınalysady. Ol Qazaqstan chempıonattarynda birneshe dúrkin jeńimpaz atandy jáne Indonezııada ótken Azııa jastar chempıonatynda qola medalge ıe boldy.
«Men Qostanaıdaǵy №15 mekteptiń 11 synybynda oqımyn. Sporttyq gımnastıkamen 5 jasymnan aınalysamyn. Sporttyq gımnastıka – sporttyń olımpıadalyq túri. Aldaǵy ýaqytta qıyndyqtarǵa tóze otyryp, jattyqtyrýshylarymmen tize qosa jumys istep, bıikterden kórinýdi, olımpıadalarda elimniń týyn kóterýdi armandaımyn» deıdi Aıan.
Oblys ákimi halyqaralyq jarystardan júlde alyp kelgen oqýshylarǵa jáne olardyń ustazdary men jattyqtyrýshylaryna «Trıýmf» syılyǵynyń sertıfıkattaryn tabys etti.
Názıra Járimbet,
«Egemen Qazaqstan»
Qostanaı