Ústimizdegi jyly Kókshetaýdaǵy Shoqan Ýálıhanov atyndaǵy memlekettik ýnıversıtetiniń janynan medısına fakýlteti ashylǵan bolatyn. Taıaýda osy fakýltette bilim alý úshin úndistandyq stýdentterdiń alǵashqy legi keldi.
Joǵary oqý orny men Úndistannyń «SunTrap 786 LIMITED» kompanııasy arasynda jasalǵan kelisimge sáıkes úndistandyq 27 talapker Kókshege kelip jetti. Kelisim boıynsha atalmysh kompanııa 2023 jyldyń alǵashqy jarty jyldyǵyna deıin Pákistan, Shrı-Lanka, Nepal, Bangladesh tárizdi memleketterden de tartylýǵa tıisti.
–Sheteldik stýdentterge barlyq qolaıly jaǵdaı jasalǵan. Fakýltet dekany orynbasarynyń laýazymyna arnaıy shtattyq birlik bólinip otyr. Biz joǵary oqý ornynyń bedelin bıiktetý qajet ekendigin jaqsy túsinemiz. Sondyqtan, vızadan bastap, turǵylyqty jerine tirkeý, alańsyz bilim alýlary úshin barlyq jaǵdaıdy týdyramyz,–deıdi halyqaralyq yntymaqtastyq, ınternasıonaldandyrý jáne akademııalyq utqyrlyq ortalyǵynyń jetekshisi Ekaterına Týrovskaıa,–tipti sheteldik stýdentterge ózderi súıip ishetin as mázirin daıyndaý úshin arnaıy aspaz da jaldap qoıdyq.
Olar qonaq úı ispetti jataqhanaǵa ornalastyryldy. Alǵashqy beıimdeý kezeńinen ótkennen keıin bilim alýǵa kirispek. Joǵary oqý ornyna tasymaldaý máselesi de sheshildi.
Endigisi bilim alý máselesi. Bul oraıda arnaıy dárister daıyndalyp, úsh tilde 3D tehnologııalary ázirlengen. Bilim úrdisi qarqyndy kýrstar túrinde júrgiziletin bolady. Sóz arasynda atalmysh ýnıversıtette qazirgi kúni Qytaı, Germanııa, Reseı, Mońǵolııa, Belarýs, Ázirbaıjan tárizdi barlyǵy on memlekettiń jastary bilim alyp jatqandyǵyn aıta ketkenimiz oryndy bolmaq. Sheteldik jastardyń kópshiligi fılologııa jáne pedagogıka fakýltetterinde bilim alýda.
Baıqal BAIÁDIL,
«Egemen Qazaqstan»
Aqmola oblysy