Kórmede ótken jyldyń eń mańyzdy oqıǵalaryn beınelegen úzdik fotosýretterdi tamashalaı alasyz.
Bıylǵy jyly qazylar alqasy 125 elden 4,5 myń fotosýretshiniń 73 myńǵa jýyq tańdaýly sýretin kerim kórinister retinde baǵalady. Jeńimpazdar men júldegerler qataryna 42 adam kirdi. Qazaqstandyqtar elimizdiń tek tórt qalasynda ǵana, ıaǵnı Astana, Qaraǵandy, Almaty jáne Shymkentte fotojýrnalısterdiń búkil álemnen jiberilgen eń úzdik fotosýretterin kórýge múmkindik alyp otyr.
World Press Photo – 2018 – bul fotojýrnalıstıka salasyndaǵy eń bedeldi halyqaralyq baıqaý jeńimpazdarynyń kórmesi bolyp sanalady. Kásibı fotosýretshilerden jáne BAQ fotoredaktorlarynan turatyn halyqaralyq táýelsiz qazylar alqasy jyl saıyn jer júziniń túkpir-túkpirinde jumys jasaıtyn fotojýrnalısterdiń, agenttikterdiń, gazet pen jýrnaldardyń úmitkerleriniń jumystaryn 9 túrli sanatta baǵalaıdy.
Sondaı-aq World Press Photo halyqaralyq fotobaıqaýy jeńimpazdarynyń kórmesi aıasynda Nıderland koroldiginiń elshisi 2018 jyldyń 10 jeltoqsanyndaǵy Halyqaralyq adam quqyǵy kúnine oraı áleýmettik mańyzǵa ıe taqyryptarǵa arnalǵan fotosýretter onlaın-baıqaýyn uıymdastyrady.
Astana men Qaraǵandydaǵy kórme aıaqtaldy. Almatydaǵy kórme 2 aptaǵa sozylady. Qazaqstanda kórme úshinshi márte ótkizilýde. Osyǵan deıin kórme Astana, Almaty, Qaraǵandy jáne О́skemende 2013 jáne 2014 jyldary ótkizilgen bolatyn.
Saparbaı PARMANQUL,
«Egemen Qazaqstan»
ALMATY