Mılan qalasynda Eýropadaǵy qaýipsizdik jáne yntymaqtastyq uıymy Syrtqy ister mınıstrleri Keńesiniń 25-shi otyrysy ótýde.
Qazaqstan Syrtqy ister mınıstri Qaırat Ábdirahmanov óz sózinde Brıýsseldegi «Azııa-Eýropa» sammıtinde (ASEM) usynylǵan Nursultan Nazarbaevtyń bastamasymen tanystyrdy.
«N. Nazarbaev Eýropalyq Odaq, Reseı, AQSh jáne Qytaı basshylarynyń birlesken talqylaýy arqyly halyqaralyq kelispeýshilikterdi sheshýdiń mańyzdylyǵyn atap ótti. Talqylaý BUU qamqorlyǵymen arnaıy sessııa túrinde ótkizilýi de múmkin, sondaı-aq Astana mundaı joǵary deńgeıdegi kezdesýge alań bola alady», delingen habarlamada.
Qazaqstannyń EQYU aımaǵynda jáne odan tys jerlerde janjaldardy retteýge, óńirlik jáne jahandyq problemalardy sheshý úshin halyqaralyq birlesken kúsh-jigerge belsene qatysýǵa degen beıildiligi atap ótildi.
«Helsınkı Qorytyndy aktisi qaǵıdattaryna negizdele otyryp, EQYU memleketteri 2010 jylǵy Astana sammıtinde erkin, demokratııalyq jáne bólinbeıtin Eýroatlantıkalyq jáne Eýrazııalyq qaýipsizdik qoǵamdastyǵynyń jalpy kórinisi týraly kelisimge keldik, biraq biz oǵan qol jetkizý joldary týraly kelispedik. Sondyqtan Helsınkı qujatynyń 45-jyldyǵyna oraı uıymdastyrýǵa bolatyn joǵary deńgeıdegi konferensııa osy baǵytta naqty shara bolady », - dep túsindirdi Mınıstr.
Qazaqstan EQYU-dyń shıelenisterdi aldyn-alý jáne sheshýge, terrorızm, radıkalızm, adam saýdasy jáne baqylanbaıtyn kóshi-qonǵa qarsy is-qımyl quraldaryn nyǵaıtýǵa múddeli. Osy rette Sırııa boıynsha Astana prosesi Eýro-Jerorta teńizi qaýipsizdigine qaýip-qaterdi tómendetýde mańyzdy ról atqarady, delingen qazaqstandyq delegasııanyń sózinde.
Eýrazııadaǵy qıyndyqtardy sheshýde halyqaralyq uıymdardyń sınergııasyn nasıhattaý maqsatynda, qatysýshy memleketter EQYU, AО́SShK jáne ASEAN Aımaqtyq qaýipsizdik forýmy hatshylyqtarynyń birlesken otyrysyn uıymdastyrý týraly Prezıdent N. Nazarbaevtyń bastamasy usynyldy.
Qatysýshylardyń nazary Aýǵanstandaǵy ahýaldyń damýy jáne osy rette Qazaqstannyń EQYU-dyń Aýǵanstan jónindegi joǵary deńgeıdegi kezdesýin 2019 jyly Astanada ótkizý nıetine aýdaryldy. Bul is-shara aımaqtyq seriktestik jáne qaýipsizdik pen damý arasyndaǵy qarym-qatynasqa baǵyttalatyn bolady.
«Qaýipsizdik pen damý týraly aıta otyryp, kópir qurýǵa qabiletti jáne kóptegen mańyzdy máseleler boıynsha konsensýsqa qol jetkizýge múmkinshilik beretin EQYU-dyń ekonomıkalyq jáne ekologııalyq ólshemderiniń úlken áleýetin umytpaýymyz kerek. Bul múmkindikterdiń biri - EQYU-dyń Astanadaǵy jańa býynynyń qalyptasýy bolatyn edi, bul ozyq tájirıbelermen, analıtıkalyq jáne ǵylymı-zertteý jumystarymen almasý arqyly ornyqty ózara baılanystylyq máselelerimen aınalysatyn edi», - dedi Qazaqstan SIM basshysy.
EQYU Ekonomıkalyq jáne ekologııalyq komıtetiniń tóraǵasy retinde Qazaqstan Mılandaǵy Syrtqy ister mınıstrler keńesiniń alańynda ózara baılanystylyq (connectivity) máseleleri boıynsha arnaıy is-shara uıymdastyrdy.
Mılandaǵy EQYU otyrysynyń aıasynda Ujymdyq qaýipsizdik týraly shart uıymyna (UQShU) múshe-memleketter Syrtqy ister mınıstrleriniń jumys kezdesýi ótti.
Sonymen qatar Mılanda Italııa, Aýstrııa, Nıderlandy, Slovakııa, Serbııa, Estonııa, Monako, Bolgarııa, Rýmynııa jáne basqa elder delegasııalarynyń basshylarymen, sondaı-aq EQYU Ulttyq azshylyqtar jónindegi Joǵarǵy komıssarymen ekijaqty kezdesýler ótkizilýde.
EQYU mınıstrlik kezdesýi ashylýynyń qarsańynda Qyrǵyzstannyń tóraǵalyǵymen Ujymdyq qaýipsizdik týraly shart uıymynyń múshe-memleketteri syrtqy saıası vedomstvolary basshylarynyń jumys kezdesýi ótti.