Abaı mádenı demalys kesheninde bas qosqan memlekettik qyzmetshiler Memleket basshysynyń «Uly dalanyń jeti qyry» atty maqalasyn túsindirip, óz oılarymen bólisti.
Agenttiktiń aýmaqtyq departamentiniń basshysy Nurgúl Jannazarova, ólketanýshy Alqajan Edilhan, túrkitanýshy Bekbolat Tólegenuly, halyqty áleýmettik qorǵaý jáne kóshi qon komıtetiniń Mańǵystaý oblysy boıynsha departament basshysy Arman Eldesov sóz sóıledi.
- Biz árbir elge nemese ultqa eliktemeı, kerisinshe ózimiz ózgelerge úlgi bola bilýimiz kerek. Bul jerde eń bastysy sanany ózgertý mańyzdy. Sonda ǵana qoǵam jaqsylyqqa qaraı qadam basady, al bizder soǵan sebepker bola bilýimiz kerek, ásirese memlekettik qyzmetshiler. Halqymyzda «Otan otbasynan bastalady» degen de bir sóz bar. Sol sebepti árbir januıada izgilik, ımandylyq, jaýapkershilik týraly kóbirek aıtylsa, Otanǵa degen súıispenshilik qalyptasa túsedi, nátıjesinde rýhanı turǵydan damı túserimiz sózsiz, - dedi Agenttiktiń aýmaqtyq departamentiniń basshysy, Ádep jónindegi keńes tóraıymy N.Jannazarova.
Qazaq eliniń ár óńiri qasıetti jáne tarıhyn tereńnen bilý – árbir qazaqstandyqtyń paryzy. Prezıdent «Bolashaqqa baǵdar: rýhanı jańǵyrý» maqalasynda osy máselege basa nazar aýdaryp, «Týǵan jer» baǵdarlamasyn usynǵany belgili. Bul rette óskeleń urpaqty týǵan jerdiń tarıhyn bilýge jáne otansúıgishtikke tárbıeleý mańyzdy degen Nurgúl Almasqyzy «Bolashaqqa baǵdar: rýhanı jańǵyrý» jáne «Uly dalanyń jeti qyry» atty maqalada ajyramas baılanystyń baryn, týǵan ólkege súıispenshilik týǵan tarıhyńdy tereńnen bilýden, atamekenińdi qurmetteýden bastalatynyn jáne «Tarıhyńdy bilmeı, bolashaǵyńdy boljaı almaısyń» degen babalar sózin esten shyǵarmaýǵa shaqyrdy.
- Ult kóshbasshysynyń óz maqalasynda Qazaqstan kúlli túrik halyqtarynyń qasıetti qara shańyraǵy, Túrki áleminiń besigi, Túrki áleminiń genezısi dep atap kórsetýi altyn dińgegimizdi aıqyndap berdi dep oılaımyn. 2014 jyly Túrkııanyń Premer-mınıstri Redjep Taıyp Erdoǵan Fransııa astanasy Parıjdegi qandastarmyzben kezdesýine: Biz túbi de, tegi de bir halyqpyz. Ataly tuqym eshqashan azyp tozbaıdy dep shegelep bergen bolatyn. Ulylardyń ulysy tigilip tulpardyń tuıaǵy shańdatqan Mańǵaz Mańǵystaýda talaı jeńisterdiń kýási bolǵan qasıetti meken. Beket ata, Shopan ata, Seısem ata, Áıgili Shah mardan qıssasyndaǵy Shaqpaq ata ǵasyrlar boıy rýhanı azyǵymyz bolyp kele jatyr, dedi Prezıdenttiń Uly dalanyń jeti qyry maqalasyna pikir bildirgenderdiń biri - halyqty áleýmettik qorǵaý jáne kóshi-qon komıtetiniń Mańǵystaý oblysy boıynsha departament basshysy A. Eldesov.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy