Aımaqta sport nysandarynyń qoljetimdiligi men buqaralyq sportty damytýǵa erekshe kóńil bólinedi, - dep habarlaıdy Atyraý oblystyq О́ńirlik kommýnıkasııalar qyzmeti.
Atyraý oblysynda bıylǵy sport salasynyń kórsetkishteri qorytyndylandy. Oblystyq dene shynyqtyrý jáne sport basqarmasynyń málimeti boıynsha jyl basynan beri 1200 sporttyq shara ótken, onyń basym bóligi aýyldyq jerlerde uıymdastyryldy. Sharalarǵa jalpy alǵanda 245 myń adam qatysty.
Qazir oblys boıynsha 858 dene tárbıesi ujymy jumys isteıdi. Onyń ishinde 16 balalar men jasóspirimder sport mektebi, 6 balalar men jasóspirimderdiń dene shynyqtyrý klýby balalarǵa sporttyń 22 túrimen aınalysýǵa múmkindik beredi. Olımpıadalyq rezerv daıyndaý ortalyǵynda 159 oqýshy sportpen shuǵyldanady.
-2018 jyly bizdiń sportshylar ár túrli deńgeıdegi sporttyq sharalarǵa qatysyp, 1194 medal jeńip aldy. Bıyldyń ózinde oblysta 10 halyqaralyq dárejedegi sport sheberi, 18 sport sheberi, 145 sport sheberligine úmitker daıyndaldy. Osy jyly 220 atyraýlyq sportshy birneshe sport túrlerinen Qazaqstan Respýblıkasynyń ulttyq qurama komandasyna kirdi, - deıdi oblystyq dene shynyqtyrý jáne sport basqarmasynyń basshysy Rınat Ibragımov.
Aımaqta sporttyq ınfraqurylymdy damytý aıryqsha nazarda. Jyl basynan beri 52 nysan (Atyraý qalasynda, Isataı aýdanynda sport keshenderi, 25 sport zaly, 19 sport alańy, Qyzylqoǵa aýdany Saǵyz selosynda tır) paıdalanýǵa berildi. Mahambet aýdany Aqjaıyq aýylynda dene shynyqtyrý-saýyqtyrý kesheni qurylysy aıaqtalýy jaqyn. Jylyoı, Qurmanǵazy aýdandarynda sport keshenderi salynyp jatyr. Jaqyn bolashaqta dene shynyqtyrý jáne sportpen aınalysý úshin 45 nysan qurylysy júrgiziledi. Sportty damytýǵa qarajat tek memlekettik bıýdjetten ǵana bólinbeıdi. Sporttyq ınfraqurylymdy damytýǵa kommersııalyq qurylymdar da úles qosýda. Atyraýda memlekettik-jekemenshik áriptestik arqyly jabyq jeńil atletıka manejin salý josparda bar.
-О́ńirde ulttyq sport túrleri de órkendep keledi. Qazir oblysta ulttyq sporttyń 8 túrin damytýǵa baǵyttalǵan sporttyq klýb jumys isteıdi. Sporttyq mektepterde toǵyzqumalaq, qazaqsha kúres úıirmeleri bar, jekpe-jekten oblystyq federasııa qurylǵan. 2018 jyly Atyraýda ulttyq sport túrleri boıynsha «Kaspıı kýbogi-Jaıyq jaǵasynda» halyqaralyq týrnıri ótti, - deıdi Rınat Ibragımov. –Oblysta 8 sport klýby bar: voleıbol, basketbol, fýtbol, hokkeı, boks, t.b. Aımaqta múmkindigi shekteýli jandardyń da sportpen aınalysýlary úshin jaǵdaı jasalǵan. Atyraý oblysynan paralımpıada quramasyna 44 sportshy endi. 13 sportshynyń halyqaralyq dárejedegi sport sheberi ataǵy bar, 27 sportshy Qazaqstan Respýblıkasynyń sport sheberi, 45 sport sheberligine úmitker bar.
-Jeńil atletıka marafonyn uıymdastyrý dástúrge aınaldy. Bıyl 4 marafon men velojarys ótip, oǵan myńnan astam atyraýlyqtar men qala qonaqtary qatysty. Mundaı sharalar turǵyndardyń qyzyǵýshylyqtaryn arttyryp, salamatty ómir saltyn ustanýlaryna jol ashady. Aıta ketý kerek, oblys turǵyndarynyń 31 paıyzy sportpen aınalysady, - deıdi basqarma basshysy.
Sport pen salamatty ómir saltyn nasıhattaý úshin qalada «sporttyq aıaldamalar» - kóshedegi jattyǵý qondyrǵylary ornatyldy. Oblys ortalyǵynyń ár bóliginde 30 jattyǵý quraly, 4 «Street Workout» alańy bar. Skeıt-parkýr, strıt-vorkaýtpen aınalysatyn oryndar qarastyrylǵan jastar saıabaǵynyń qurylysy boıynsha jumystar bastaldy, jańa nysan aýmaǵynda velosıped joly da bolady.