Semeıdegi Muhtar Áýezov atyndaǵy pedagogıkalyq kolledj ujymy ata-ana qamqorlyǵynsyz qalǵan boıjetkenge bir bólmeli páterdiń kiltin syıǵa tartty. Baspanaly bolǵan Nazerke Qostaeva osy bilim ordasyn byltyr «Pedagog-uıymdastyrýshy» mamandyǵy boıynsha támámdaǵan eken. Oqyp júrgen kezinde kolledjdiń jataqhanasynda turypty.
Shahardyń Shyǵys kentindegi kópqabatty úılerdiń birinde ornalasqan páterdiń quny 2 mln 700 myń teńge turady eken. Kolledj dırektory Shaǵangúl Janaeva bul qarajatty jınaý úshin oqý ornynyń barlyq qyzmetkerleri Nazerkeniń jeke shotyna bir kúndik jalaqylaryn aýdarǵanyn aıtady.
Baspanasyz júrý kimge ońaı tıgen?! Páter kiltin qolyna alǵanda Nazerke tolqyp, kózine jas aldy. «Nazerkeniń kóp qınalǵanyn bilesizder. Densaýlyǵy da azdap syr berdi. Operasııaǵa da jatty. Bizge oqýǵa О́skemennen keldi. Búgin mine, sonyń bári umytylǵandaı. Endi tek qana qýanysh, tek qana jaqsylyq bolsyn. Jaraı ma?», - degen Shaǵangúl Janaeva shákirtiniń mańdaıynan súıip, páter kiltin tapsyryp, izgi lebizin jetkizdi.
Azamat QASYM,
«Egemen Qazaqstan»
Semeı