Qaraǵandy oblysynda alty qus fabrıkasy jumys isteıdi: onyń tórteýi jumyrtqa shyǵarýmen aınalyssa, qalǵan ekeýi taýyq etin óndiredi. 2018 jyly osy fabrıkalarǵa 1,1 mlrd teńge sýbsıdııa bólindi.
– Jumyrtqa óndirýge ketken shyǵyndy arzandatý úshin jyl basynan beri qus fabrıkalaryna 559 mln teńge sýbsıdııa berildi. Et óndiretin qus fabrıkalary 230 mln teńge aldy. Qarashada oblystyq bıýdjetti sońǵy ret naqtylaǵan kezde mal sharýashylyǵyn sýbsıdııalaýǵa qosymsha 950 mln teńge bólindi jáne osy somanyń jartysynan astamy qus óndirý salasyna baǵyttaldy, – dedi Qaraǵandy oblystyq aýyl sharýashylyq basqarmasynyń jetekshisi Saǵynjan Apaqashov.
Oblysta jyl basynan beri shamamen 600 mln dana jumyrtqa óndirilgen. Bul kólem ishki qajettilikti qanaǵattandyra alady. О́nim shet elge eksporttalady. Bıylǵy jyly Aýǵanstan men О́zbekstanǵa Qaraǵandy oblysynan 170 mln dana jumyrtqa jiberilgen.
– Memlekettik qoldaýsyz biz damı almaıtyn edik. Sýbsıdııanyń arqasynda óndirisimizdi jańartyp, jańǵyrtyp jatyrmyz. Qazirgi tańda biz eki qus saqtaýshy ǵımaratta jabdyqtardy jańartýdy aıaqtap qaldyq. Osy jyly qus tezegin óńdeýge arnalǵan bıogazdyq stansany iske qostyq jáne óndirilgen elektr qýatyn qazirden bastap syrtqy naryqqa «jasyl baǵamen» satyp jatyrmyz, – deıdi «Qurma» Agrofırmasy» JShS-niń dırektory Aleksandr Dıdenko.
Qaırat ÁBILDA,
«Egemen Qazaqstan»
Qaraǵandy