«Turǵyn úı kommýnaldyq-sharýashylyǵyn jańǵyrtý men damytýdyń qazaqstandyq ortalyǵy» AQ qalalyq ınfraqurylymdy qarjylandyrýdyń qazaqstandyq baǵdarlamasyn birlesip ázirleý úshin Dúnıejúzilik bank ókilderimen kezdesti. Baǵdarlama maqsaty – Azııa Damý Banki men Dúnıejúzilik banktiń qatysýymen jáne jeke sektordy tarta otyryp, TKSh sektory úshin ınvestısııalar tartý tetigin ázirleý bolyp tabylady.
Eki tarap baǵdarlamaǵa odan ári qatysý úshin Qazaqstan óńirleriniń áleýetin damytý jáne arttyrý qajettigin atap ótti. Osyǵan baılanysty Dúnıejúzilik banki keńes berý, ákimdikterdiń kredıt qabilettiligin baǵalaý, baǵdarlamanyń talaptaryna jaýap beretin ınvestısııalyq jobalar portfelin ázirleý syndy basqa da tehnıkalyq kómek berý múmkindikterin qarastyrady.
«Turǵyn úı-kommýnaldyq sharýashylyǵynyń negizgi máselesi osy saladaǵy ashyqtyqtyń jetispeýshiligi men kommýnaldyq jelilerdiń ábden tozyǵynyń jetkeni bolyp otyr. Biz qazir sheteldik kompanııalarmen jáne halyqaralyq qarjy uıymdarymen barynsha belsendi kezdesýler ótkizip otyrmyz. Júrgizilip jatqan jumystyń negizgi maqsaty – jańa tehnologııalar transferi, bıýdjetten tys ınvestısııalardy tartý, Qazaqstannyń turǵyn úı-kommýnaldyq salasynyń aıqyndylyǵyn qamtamasyz etý jáne ınvestısııalyq tartymdylyǵyn arttyrý», – dedi «TKSh QazOrtalyǵy» AQ Basqarma tóraǵasynyń birinshi orynbasary Ádilhan О́mirbaev.
Dúnıejúzilik Bank ınfraqurylymyn damytý jónindegi baǵdarlamanyń jetekshisi Pol Vallelı Qazaqstannyń qalalary men ınfraqurylymyn damytý sektorynda usynylǵan mindetter óte mańyzdy ekenin atady. Jáne olardyń tabysty sheshý úshin tıisti reformalardy júrgizýde jan-jaqty qamtylyp, ekshelgen ári turaqty baǵdarlama qajet dedi. Ol sondaı-aq Dúnıejúzilik bank TKSh normatıvtik bazasyn, menedjment standarttaryn jetildirý, kommýnaldyq kásiporyndardyń sapasy men tıimdiligin arttyrý, jobalardy qarjylandyrýdyń ońtaıly júıesin qamtamasyz etý jónindegi sharalar keshenin qamtıtyn balamaly baǵdarlamany qarastyrýǵa daıyn ekenin atady.
О́z kezeginde «TKSh QazOrtalyǵy» AQ ókilderi Qazaqstan Úkimeti osy salany damytý úshin usynyp otyrǵan sharalar legi týraly sóz qozǵady. Olar TKSh keshenin sıfrlandyrýdy, kóp páterli turǵyn úılerdi aspaptandyrý baǵdarlamasy men óńirler ákimdikterimen birlesip iske asyrylatyn jańa tehnologııalardy engizý jónindegi jobalardy qamtıdy.
Taraptar áriptestikti kúsheıtýge kelisti jáne QR turǵyn úı-kommýnaldyq sektoryn jańǵyrtý salasyndaǵy yntymaqtastyqty damytý úshin kelesi qadamdardy talqylady.
Aınash ESALI,
«Egemen Qazaqstan».
ALMATY