Qansha tyıym bolǵanymen suǵanaq qoldar kıik atýyn qoımaıdy. Jangeldın aýdandyq polısııa bólimi tabıǵat qorǵaý polısııasynyń qyzmetkerleri «Ohotzooprom» mekemesiniń ınspektorlarymen birlesip reıd júrgizdi.
Olar Torǵaı-Arqalyq tas jolynyń Shubalań eldi mekenine jaqyn tusynda «Toıoto» markaly mashınany toqtatty. Mashına júrgizip kele jatqan 38 jastaǵy jigit Jangeldın aýdanyndaǵy Aqkól aýylynyń turǵyny bolyp shyqty. Teksergende mashınadan kıiktiń múıizi jáne 12 kalıbrli myltyqtyń patrondary tabyldy.
Bul fakt QR QK 339-baby, ıaǵnı «Sırek jáne quryp ketý aldynda turǵan, sondaı-aq paıdalanýǵa tyıym salǵan janýarlardy zańsyz atqany úshin» sotqa deıingi istiń birińǵaı tizimine tirkeldi. Sotqa deıingi tergeý kezinde kúdikti is-áreketin moıyndady. Ol kıiktiń tórt tekesin atyp, múıizin kesip alǵan da, denesin laqtyryp ketken. Polıseıler kúdiktiniń kórsetýimen ol ań aýlaǵan jerge baryp, kıikterdiń óleksesin jıyp aldy. Tabıǵat qaskóıi óz erkimen myltyǵyn tapsyrdy. Qazir qylmystyq is boıynsha saraptama taǵaıyndaldy
Názıra JÁRIMBET,
«Egemen Qazaqstan»
Qostanaı