«Rýhanı jańǵyrý» baǵdarlamasy aıasynda Qoǵamdyq damý mınıstrligi uıymdastyrǵan respýblıkalyq «Jomart júrek» baıqaýynda Qyzyljar óńiriniń qos kásipkeri laýreat atandy.
«Noǵaıbaı JShS-niń dırektory Altynbek Saparov «Jyl mesenaty» atalymyna ıe boldy. Ol áleýmettik salalarǵa úzbeı qarjylyq qoldaý kórsetip keledi. Qaraqoǵa-Noǵaıbaı baǵytynda sý taratqysh nasosty iske qosyp, ár úıge sapaly aýyz sý jetkizildi. 200 oryndy kitaphana men akt zaly paıdalanýǵa berildi. Byltyr 5 úı turǵyzylsa, bıyl 28 mıllıon teńgege 4 úı salyndy. Shaǵyn fýtbol, basketbol,búldirshinderdiń oıyn alańdary paıdalanýǵa berildi. Kóshelerge jaryq tartylyp, asfalttaldy.
«Daıyndyq JShS-niń basshysy Birjan Shaımerdnov «Jyl tulǵasy» atalymynda top jardy. Agroqurylym eginshilikpen de, mal sharýashylyǵymen de aınalysady. Qazir 1325 iri qara maly, onyń ishinde 610 saýyn sıyr baǵylady. Jyl ótken saıyn maıly daqyldar egistiginiń kólemi artyp keledi.
Daıyndyq aýylynda barlyq áleýmettik nysandar jumys istep tur. Isker basshynyń aýyldastary jumyssyzdyqtyń ne ekenin bilmeıdi. Ortasha eńbekaqy 90 myń teńgeni quraıdy.
Barlyq úılerge aýyz sý, jylý jelisi tartylǵan. 3 otbasy qonys toıyn toılady. Mektepti jóndeýge 65 mıllıon teńge jumsaldy. Jansúgir batyrdyń kesenesin turǵyzýǵa seriktestik esebinen 14 mıllıon teńge bólindi.
О́mir ESQALI,
«Egemen Qazaqstan»
Soltústik Qazaqstan oblysy