Syrtqy ister mınıstrliginde Qazaqstanyń Sıngapýrdaǵy jáne Jańa Zelandııadaǵy Tótenshe jáne О́kiletti Elshisi Úsen Súleımenniń Qazaqstan men Sıngapýr arasyndaǵy yntymaqtastyqtyń qazirgi jaǵdaıy men perspektıvalary týraly brıfıngi ótti.
Is-shara barysynda Ú. Súleımen Qazaqstan men Sıngapýr arasyndaǵy qarym-qatynastarynyń ahýaly men perspektıvalary týraly áńgimelep, memleketter arasyndaǵy yntymaqtastyq deńgeıi ekijaqty kún tártibiniń barlyq spektri boıynsha qarym-qatynasty odan ári tereńdete túsý úshin eleýli áleýet bar ekenin aıryqsha atap ótti.
Búgingi tańda Sıngapýr Qazaqstannyń Ońtústik-Shyǵys Azııadaǵy eń mańyzdy saýda-ekonomıkalyq áriptesteriniń biri bolyp tanylady. Qazaqstanda óndiris, saýda, IKT, qurylys jáne qarjy salasyndaǵy 100-den astam birlesken kásiporyn jumys isteıdi.
2018 jyly Qazaqstan men Sıngapýr eki jaqty qarym-qatynastarynyń 25 jyldyǵyn atap ótip, eki el arasyndaǵy yntymaqtastyqtyń tamasha nátıjelerin kórsetti. Osylaısha, 2018 jyldyń qańtar-qyrkúıek aralyǵynda ekijaqty taýar aınalymy 402,9 mln. AQSh dollaryn qurady, bul 2017 jyldyń atap ótilgen kezeńindegi deńgeıinen 5,5 esege joǵary. Qazaqstannan eksport kólemi 8 esege artyp, atap ótilgen kezeńde 372,6 mln. AQSh dollaryn qurady. Bul derekter eki el arasyndaǵy saýda-ekonomıkalyq yntymaqtastyqtyń zor áleýetin kórsetedi.
Qazaqstandyq dıplomat Sıngapýrlyq tájirıbe bizdiń Táýelsizdigimizdiń alǵashqy kúnderinen bastap jáne odan buryn Qazaqstan úshin úlken qyzyǵýshylyq týǵyzǵandyǵy týraly atap ótti. Zamanaýı Sıngapýrdyń negizin qalaýshy, birinshi Premer-Mınıstri Lı Kýan Iý myrza 1991 jyldyń qyrkúıeginde, Qazaqstan táýelsizdik alǵanǵa deıin úsh aı buryn, Almaty jáne Shymkent qalalaryna sapar jasaǵan bolatyn. Joǵary deńgeıde jaqyn dostyq baılanys ornatyldy. 1996 jyly Nursultan Nazarbaevtyń Sıngapýrǵa jasaǵan resmı sapary jáne 2003 jyly memlekettik sapary tek joǵarǵy deńgeıde ǵana emes, sonymen qatar eki memleket arasyndaǵy dostyq qarym-qatynastardy da nyǵaıta aldy.
Eki memleket halyqaralyq arenadaǵy ózara bastamalaryn qoldaýǵa tyrysady.
2018 jylǵy 20-21 qarashada ótken QR Premer-Mınıstri Baqytjan Saǵyntaevtyń Sıngapýrǵa jumys sapary sheńberinde Qazaqstandyq-sıngapýrlyq bıznes-forýmy uıymdastyrylyp, oǵan eki eldiń iskerlik toptarynyń 500-den astam ókili, memlekettik organdary men ulttyq kompanııalarynyń basshylary qatysty.
Sapardyń mańyzdy nátıjeleriniń qatarynda úkimetaralyq ınvestısııalardy kótermeleý jáne ózara qorǵaý týraly, dıplomatııalyq jáne qyzmettik/resmı pasporttardyń ıelerin vızalyq talaptardan ózara bosatý týraly kelisimderi, sondaı-aq IKT jáne qarjylyq tehnologııalar, qurylys, bilim, munaı-hımııa jáne tamaq ónerkásibi salalarynda eki el arasyndaǵy yntymaqtastyqty keńeıtýge baǵyttalǵan basqa da qujattarǵa qol qoıý oryn aldy.
Qazaqstan men Sıngapýr arasyndaǵy yntymaqtastyqtyń jaı-kúıi men perspektıvalaryn qorytyndylaı kele, Ú. Súleımen eki el arasyndaǵy qarym-qatynastar sharyqtaý shyńyna kóterilý kezeńin bastan keshirýde. Sıngapýr saıası, ekonomıkalyq, mádenı jáne gýmanıtarlyq salalardaǵy ózara yntymaqtastyq úshin ashyq. Sıngapýrdyń ǵylymı-zertteý ınstıtýttary men kompanııalary, eki eldiń qarym-qatynastarynyń barlyq kezeńderinde sııaqty, ozyq tájirıbeler men tehnologııalardy bólisýge daıyn.
Sonymen qatar Elshi Qazaqstannyń Jańa Zelandııamen yntymaqtastyǵy jóninde aıtyp berdi. Bul damyǵan elmen qarym-qatynastardy ornatý boıynsha jumystar turaqty negizde júzege asyrylýda. Sońǵy mańyzdy nátıjeler retinde Ú. Súleımen ú.j. qazan aıynyń sońynda Jańa Zelandııanyń Vellıngton jáne Oklend qalalaryna jasaǵan jumys saparynyń qorytyndylaryn usyndy.
Elshi Jańa Zelandııanyń tájirıbesi Qazaqstan úshin óte paıdaly ekenine senim bildirdi. Jańa Zelandııa Syrtqy ister mınıstrligi iri qazaqstandyq kompanııalarǵa 2019 jyldyń 12-15 maýsymynda Gamılton qalasynda Azııa-Tynyq muhıty elderiniń saýda palatalarynyń ókilderiniń qatysýymen ótetin «Fieldays» konferensııasyna qatysýǵa shaqyrý hattaryn jibergen bolatyn. Konferensııa Jańa Zelandııanyń ónerkásiptegi jetistikterin, sondaı-aq aýyl sharýashylyǵy tehnologııalary men ınnovasııalaryn pash etýdiń iri alańy bolyp tabylady.