Syrtqy ister mınıstrliginde Adam quqyqtarynyń halyqaralyq kúni jáne BUU Bas Assambleıasy Adam quqyqtarynyń jalpyǵa birdeı deklarasııasyn qabyldaǵanyna 70 jyl tolýyna arnalǵan «Memlekettiń jáne azamattyq qoǵam ınstıtýttarynyń quqyq qorǵaý qyzmeti» atty dóńgelek ústel ótti.
Is-sharada Memlekettik hatshy Gúlshara Ábdiqalyqova, Joǵarǵy Sot Tóraǵasy Jaqyp Asanov, Prezıdent janyndaǵy Adam quqyqtary jónindegi komıssııasynyń tóraǵasy Qýanysh Sultanov, dıplomatııalyq korpýs, azamattyq qoǵam jáne sarapshylar qaýymdastyǵynyń ókilderi qatysty.
Sóılegen sózinde Syrtqy ister mınıstri Qaırat Ábdirahmanov 2009 jyly Qazaqstan Adam quqyqtary jónindegi keńestiń (AQK) arnaıy rásimderiniń barlyq mandattaryna ashyq shaqyrý jiberip, mandat ıelerin únemi qabyldaıtynyn atap ótti. 2019 jyldyń mamyr aıynda BUU-nyń terrorızmge qarsy kúrestegi adam quqyqtary men negizgi bostandyqtaryn kótermeleý jáne qorǵaý jónindegi arnaıy baıandamashysy resmı saparmen Qazaqstanǵa keledi.
«Jaqyn aradaǵy perspektıvada adam quqyqtaryn qorǵaýdyń ulttyq júıesin odan ári jetildirý jónindegi mindetter Qazaqstan Prezıdenti N. Nazarbaevtyń Qazaqstan halqyna Joldaýynda baıandalǵan. Bul baǵdarlamalyq qujatqa sáıkes, zańnyń ústemdigin qamtamasyz etý, ákimshilik jáne qylmystyq zańnamany gýmanızasııalaý, sot júıesin reformalaý, sybaılas jemqorlyqqa qarsy kúresti kúsheıtý, azamattyq, áleýmettik-ekonomıkalyq jáne mádenı quqyqtar salasynda naqty sharalar qabyldaý úshin jańa sharalar qabyldanatyn bolady», - dedi Mınıstr.
Qazaqstan 2022-2024 jyldarǵa arnalǵan BUU Adam quqyqtary jónindegi keńesiniń músheligine óz kandıdatýrasyn usynǵan. Qazaqstan 2013-2015 jyldar aralyǵynda BUU AQK-niń múshesi bolǵan.
Is-sharaǵa qatysýshylar táýelsizdikke qol jetkizgennen beri Qazaqstan demokratııalyq, zaıyrly jáne quqyqtyq memleket qurý jolynda zań ústemdigin, ákimshilik jáne qylmystyq zańnamanyń shynaıylyǵyn, sot júıesin reformalaý boıynsha jumystardy jalǵastyryp, azamattyq, áleýmettik ekonomıkalyq jáne mádenı quqyqtardy qorǵaý salasynda qamtamasyz etý boıynsha sharalardy júzege asyryp turaqty turǵanyn atap ótti.
Memleketimizdiń adam quqyqtary salasyndaǵy belsendi saıasaty Qazaqstannyń BUU Qaýipsizdik Keńesindegi saılaý naýqanynyń sáttiliginde mańyzdy ról atqaryp, elimizdiń Keńestiń quramyna enýiniń aıqyndylyǵyn anyqtady. Terrorızmnen azat álemge qol jetkizý úshin Minez-qulyq kodeksin nasıhattaýǵa kóp kóńil bólinedi. Bul - Qazaqstannyń ajyramas adam quqyqtaryn iske asyrýda, birinshiden, ómir súrý quqyǵyn iske asyrýǵa naqty úlesi bolyp tabylady.