Bul týraly oblys ákimi Arhımed Muhambetovtyń qatysýymen ótken keńeıtilgen apparat májilisinde Oblystyq jolaýshylar transporty jáne avtomobıl joldary basqarmasynyń basshysy Baqytbek Esenǵulov aıtty. Jóndeý jumystary oblystyq jáne aýdandyq mańyzy bar joldardyń, eldi mekender men qalalardaǵy kóshelerdiń de barlyǵyn qamtydy. О́tken jylǵa qaraǵanda joldardyń jaqsarǵan bóligi eki prosentke artqan, sóıtip barlyq joldyń 66 prosentin quraıdy. Kelesi jyly oblystyq jáne aýdandyq mańyzy bar joldardyń jóndeý jumysyna 30 mıllıard teńge qarjy bólinedi, onyń syrtynda 11 mıllıard teńge respýblıkalyq joldardy jóndeýge jumsalatyn bolady.
Esenǵulovtyń aıtýynsha, jaz aılarynda qurylys materıaldarynyń qymbattaýy jumystyń ýaqytyly júrýine keri áser etken. Qıyrshyq tas, bıtým qymbattaǵan. Mysaly, kóktemde bıtýmnyń tonnasy 90 myń teńge bolsa, jazda ol 140 myń teńgege kóterilgen. Basqarma basshysy oblys ákiminiń suraǵyna oraı, baǵany óndiris oryndarynyń qymbattatyp otyrǵanyn ári onyń negizdi ekenin aıtty.
«Baǵanyń kóterilýi joldardyń sapasyna da keri áser etedi. Qurylys materıaldaryn únemdegen soń, onyń nátıjesi sapasyz bolady. Bıtýmdi Qazaqstanda Shymkent, Aqtaý jáne Pavlodar qalalaryndaǵy óndiris oryndary óndiredi, al qıyrshyq tas Sokolov-Sarybaı ken óndirý birlestiginen, «Qostanaı mıneraldary» aksıonerlik qoǵamdary shyǵarady. Aldaǵy ýaqytta jol qurylysy bastalmaı turyp, eń bolmasa jergilikti óndiris oryndarymen kelisim júrgizý kerek» dedi Arhımed Begejanuly.
Názıra Járimbet,
«Egemen Qazaqstan»
Qostanaı