EHRO Kongress-ortalyǵynda ótip jatqan «Indýstrııalandyrýdyń ekinshi besjyldyǵy: Qazaqstanda jasalǵan» atty jalpyulttyq telekópir barysynda Elbasy Nursultan Nazarbaev qazaqstandyq ónim shyǵaratyn úsh kásiporyndy iske qosty, dep habarlaıdy QazAqparat.
«Qurmetti Elbasy! «Prommashkomplekt» JShS jylyna 200 myń temirjol dóńgelegin shyǵaratyn zaýyt qurylysyn aıaqtady. Bul, joǵary tehnologııaly, 100 paıyz ımporttyń ornyn basatyn óndiris. Joba quny 54 mlrd teńge, onyń 36 mlrd teńgesi - Qazaqstan Damý bankiniń kredıttik qarajaty. О́ndiristik qýatqa shyqqannan keıin «Prommashkomplekt» shtaty myń adamnan asatyn bolady. О́nimniń úshten ekisi syrtqy naryqqa shyǵarylady», - dedi «Prommashkomplekt» JShS basqarma tóraǵasy Dáýlet Syzdyqov.
Al «Alageum Electric» AQ Baqylaý keńesiniń tóraǵasy Saıdýlla Qojabaev Qazaqstan tarıhynda birinshi bolyp kerneýi 220 kV transformatorlar óndirisin jolǵa qoıylǵanyn atap ótti.
«Qurmetti Nursultan Ábishuly, «Asia Trafo» bul - ınnovasııalyq kásiporyn. Biz óndiristik qýatymyzdy arttyryp qana qoımaı, Ortalyq Azııada teńdesi joq elektr synaq zerthanasyn qurdyq. Jobanyń alǵashqy kezeńin aıaqtadyq. Nátıjesinde Qazaqstan tarıhynda birinshi bolyp kerneýi 220 kV transformatorlar óndirisin jolǵa qoıdyq. Ekinshi kezeńde sıfrlyq transformatorlardy óndirýdi josparlap otyrmyz. Búginde júzdegen kásiporyn serpindi túrde damyp, osy ýaqytqa deıin elimiz ımporttap kelgen ónimderdi ózderi shyǵara bastaǵany úshin Sizge alǵysymyzdy bildiremiz!», - dedi ol.
«Shina Gezhouba Group Cement Co., Ltd» kompanııasynyń bas dırektory, «Kompanııa Gejýba Shıeli Sement» JShS basqarma tóraǵasy Mıng Lı Qazaqstan Prezıdentinen úsh kásiporyndy iske qosýǵa ruqsat surady.
«Qadirli Prezıdent! Bizdiń kásiporyn Qazaqstanda qalyptasqan qolaıly ınvestısııalyq ahýaldyń jemisi. Búkil álem ınvestısııalar men tehnologııalardy tartý jolyndaǵy Sizdiń eńbegińizdi jaqsy biledi. Bizdiń joba Qazaqstan-Qytaı seriktestiginiń nátıjesi. Qazaqstannyń úsh birdeı jańa óndirisiniń ujymdary Sizden kásiporyndardy iske qosýdy suraıdy», - dedi Mıng Lı.
QR Prezıdenti atalǵan úsh kásiporynnyń da jumysyn bastaýǵa ruqsat berdi.
«Barshalaryńyzdy osy tabystaryńyzben shyn júrekten quttyqtaımyn. Bul óndiristerdiń úsheýi de buryn Qazaqstanda bolmaǵan. Temirjol quramalaryna arnalǵan dóńgelekterdi ımportaıtyn edik. Mundaı qýatty trasformatorlardy shyǵarǵan joqpyz», - dep atap ótken Elbasy, Shıeli sement zaýytynyń da aldaǵy áleýetin joǵary baǵalady.