Mańǵystaý oblysynyń ákimdigi men «Halyqaralyq jasyl tehnologııalar jáne ınvestısııalyq jobalar ortalyǵy» (HJTIJO) jetekshisi Rápil Joshybaev óńirge jasyl tehnologııalar jáne ınvestısııalyq jobalar engizý maqsatynda ózara seriktestik týraly memorandýmǵa qol qoıdy.
Usynylǵan qujat Mańǵystaý óńirinde iske asyrylatyn jobalarǵa qatysty máselelerdiń keń spektrin qarastyrady, onyń ishinde:turaqty damý, ekologııa, jańǵyrtylatyn energııa kózderin qurastyrý, energııa tıimdiligi jáne energııa únemdiligi, sandyq júıege kóshý, qaldyqtardy kádege jaratý jáne qaıta óńdeý jobalary.
Bıyl tamyz aıynda Mańǵystaý oblysynda Halyqaralyq jasyl tehnologııalar jáne ınvestısııalyq jobalar ortalyǵynyń qoldaýymen 42 MVt qýaty jel elektr stansııasynyń qurylysy bastaldy.
Kezdesý barysynda HJTIJO jetekshisi Rápil Joshybaev bul baǵytta Mańǵystaý óńirinde belsendi jumys júrgizilýde, sondyqtan Ortalyq múmkindikterin energııalyq jáne ekologııalyq máselelerdi sheshýdiń ońtaıly nusqalaryn tabýǵa arnalǵan jan-jaqty alańǵa aınaldyrý kerektigin aıtyp ótti.
Osy maqsatta memorandýmǵa qatysýshy taraptar aqparat almasý,óńirdegi keshendi jobalardy iske asyrýǵa kómektesý, ınvestısııalyq, ekologııalyq, ınnovasııalyq jáne jasyl ekonomıkany damytýǵa arnalǵan ǵylymı-bilim jobalar barysynda birigip jumys atqarýǵa kelisti.
Tehnıkalyq jáne ákimshilik qoldaý aıasynda, sonymen qatar jasyl ınvestısııalyq jobalardy iske asyrý maqsatynda HJTIJO «bir tereze» qaǵıdasy negizinde múddeli taraptarǵa qyzmet atqarady.
«HJTIJO» kommersııalyq emes aksıonerlik qoǵamy «EKSPO-2017» kórmesiniń murasy jáne ınfraqurylymdyq bazasy negizinde Elbasynyń bastamasymen qurylyp, Birikken Ulttar Uıymy Jalpy Assambleıasynyń 70 jyldyq mereıtoıynda atap ótildi.
Ortalyq XI Astanalyq Ekonomıkalyq Forým – GLOBAL CHALLENGES SUMMIT aıasynda 2018 jyly 17 mamyrda tanystyryldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy