Medısınalyq saqtandyrý – medısınalyq qyzmet sapasynyń jáne onyń qoljetimdiliginiń kepili. Medısınalyq saqtandyrý júıesin engizý halyqtyń medısınalyq qyzmetke degen kúnnen kúnge ósip kele jatqan suranysyn qanaǵattandyrady dep kútilýde.
Qarasha aıynda Medısınalyq saqtandyrý qoryna 8,64 mlrd teńgeden astam jarna tústi. Júıe iske qosylǵan 2017 jyldyń 1 shildesinen 2018 jyldyń 30 qarashasyna deıingi aralyqta jınaqtalǵan jarnanyń jalpy somasy 122,47 mlrd teńgege jetti. Onyń 113,83 mlrd teńgesi (shamamen 93%) jumys berýshilerdiń aýdarymdary bolsa, qalǵan 8,64 mlrd teńge (7%) – jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili.
2017 jylǵy 1 shilde men 2018 jylǵy 30 qarasha aralyǵyndaǵy elordalyq jumys berýshiler men kásipkerler aýdarǵan jarna somasy - 15,38 mlrd teńge. Qarasha aıyndaǵy kórsetkish – 1,08 mlrd teńgeni quraıdy.
Jalpy, aımaqtyq turǵydan alǵanda, jarna tóleý jaǵynan alǵashqy úshtikte burynǵysha Almaty, Astana qalalary men Qaraǵandy oblysy kósh bastap tur.
Esterińizge salamyz, mindetti áleýmettik medısınalyq saqtandyrý jarnalary, ıaǵnı jınaqtalǵan qarjy Ulttyq bankte saqtalady. Áleýmettik medısınalyq saqtandyrý qory Ulttyq bankpen senimgerlik basqarý týraly kelisimshart jasasqan. 2020 jyldan bastap bul qarajat Mindetti áleýmettik medısınalyq saqtandyrý paketi sheńberindegi qyzmetter aqysyn tóleýge jumsalady.