Búgin «Nur Otan» partııasynyń ókilderi men Astana qalasyndaǵy qoǵamdyq birlestikter, dıplomatııalyq ókildikter músheleri kezdesti. Kezdesý barysynda qonaqtar Serik Esmatovqa jańa arba, noýtbýk jáne sporttyq kostıýmder tabys etti.
2 jeltoqsan kúni Elshilerdiń áıelderi qaýymdastyǵy men Astanadaǵy dıplomatııalyq mıssııalary uıymdastyrǵan jyl saıynǵy qaıyrymdylyq jármeńkesi ótken bolatyn. Jasotandyq belsendiler jármeńkeden syrt qalmaı, Serik Esmatovtyń atynan qaıyrymdylyq sharaǵa 100 bılet satyp aldy. Jınalǵan qarajatqa «Nur Otan» partııasynyń múshesi, «Qazaqstannyń 100 jańa ecimi» jobasynyń jeńimpazy, voleıbol boıynsha Qazaqstannyń paraolımpııalyq jastar quramasynyń kapıtany Serik Esmatovqa múgedek arbasy satyp alyndy. Sondaı-aq Birikken Arab Ámirlikteriniń Elshiligi sportshyǵa noýtbýkpen qatar, BAÁ-ne otbasymen birge joldama berdi. Jármeńkede sportshynyń atynan jazylǵan bıletter lotereıada utysty bolyp, demeýshilerdiń túrli syılyqtaryn utyp aldy.
Kezdesýge kelgen qonaqtar arasynda Belarýs Respýblıkasynyń Qazaqstandaǵy Tótenshe jáne О́kiletti elshisinyń áıeli Nıchkasova Iýlııa, BAÁ Elshiliginiń Ýaqytsha Senimdi ókili Ammar Albreıkı, «Dos» Táýelsiz О́mir» QB prezıdenti Erdıldınova Dına, Astana qalasynyń «Respýblıkalyq áıelder keńesi» QB tóraǵasy Baltaeva Hanzada bar.
Serik Esmatov – «Nur Otan» partııasynyń múshesi, paralımpıadashy, týrızm jáne sport akademııasynyń stýdenti, voleıboldan Qazaqstan jastar quramasynyń kapıtany. «Qazaqstannyń 100 jańa esimi» jobasynyń jeńimpazy. Bala kezinen sportpen belsendi aınalysyp keledi. Alaıda 2011 jyldyń 30 tamyzynda ol poezdyń astyna túsip, eki aıaǵynan aıyrylǵan. Rýhyn joǵaltpaǵan Serik sportpen aınalysýdy toqtatpady. Kerisinshe kóptegen túrine qyzyǵa bastady. Ol voleıbol oınap, jeńil atletıkamen aınalysady. Arbada júgirýge qatysady, ıadro men naıza laqtyrady. Sońǵy ýaqytta aýyr atletıka men júzýde ózin synap júr. 2013 jyldyń qazan aıynda Serik Malaızııada ótken alǵashqy iri jarysyna qatysty. Seriktiń «Jas Otan» Jastar qanatynyń IV Sezinde sóılegen sózi jastarǵa erekshe motıvasııa berdi.