21 jeltoqsanda «Almaty Arena» sport kesheninde erejesiz jekpe-jekten «Titan FC 51» dep atalatyn halyqaralyq týrnıri ótedi. Aıtýly jarysta Qazaqstan, Brazılııa, Qytaı, AQSh, Kanada jáne taǵy basqa elderdiń kelgen myqty sportshylary kúsh synasady.
Almaty qalasy ákimdiginiń qoldaýymen ótetin álemdik dodanyń uıymdastyrýshylary aralas jekpe-jekten halyqaralyq «Titan FC» uıymy men «Alemfighters» klýby bolyp tabylady. Týrnır faıtkardyna eki tıtýldy jekpe-jek kirip otyr. Atap aıtsaq, 57 kılo salmaqtaǵy chempıondyq belbeýdi kolýmbııalyq Hýan Pýerta (15-6) men qazaqstandyq sportshy Qazybek Áshimov (13-3) sarapqa salady. Al bul keshtiń basty jekpe-jeginde Beıbit Nazarov (14-3) pen amerıkalyq Martın Braýn (12-5) aıqasady. Olar jeńil salmaqta (70,3 kg) ýaqytsha chempıondyq belbeý úshin talsady.
Almatyda ótetin jarys barysynda 15 jekpe-jek ótkizýdi kózdep otyrmyz. Reıtıngtik básekelerde negizinen «Alemfighters» klýbynyń jaýyngerleri judyryqtasady. О́zderin jaqsy qyrynan kórsetken jigitter «Titan FC» lıgasyna qabyldanady. Sol lıgada júrip kózge túsken sportshylardyń 70 paıyzy UFC-de baq synap júrgeni barshaǵa málim. Olaı bolsa, bizdiń órender úshin de álemniń eń beldi uıymynda óner kórsetýge tamasha múmkindik týyndap otyr, – deıdi «Alemfighters» klýbynyń basshysy Ardaq Nazarov.
Ǵalym SÚLEIMEN,
«Egemen Qazaqstan».
ALMATY