Elaralyq mańyzdy zań jobalary maquldandy

Sonyń ishinde «Qazaqstan Respýblıkasynyń Úkimeti men Tájikstan Respýblıkasynyń Úki­meti arasyndaǵy kóshi-qon sala­syndaǵy yntymaqtastyq týraly kelisimdi ratıfıkasııalaý týraly» zań jobasy qaraldy. Bul týraly baıandamany Ishki ister mınıstri Qalmuhanbet Qasymov jasady. Kelisimge 2018 jyldyń 19 naýryzynda Astana qalasynda qol qoıylǵan. Ol kóshi-qon aǵym­daryn retteý men azamattyq berý máselelerinn sheshýde qolaıly jaǵdaılar jasaıdy. Sonyń ishinde Kelisim sta­tıstıkalyq-qu­qyqtyq jáne ǵy­lymı-meto­do­logııalyq aqpa­rattarmen, tarap­tar azamat­tarynyń derek­terimen almasýlar­dy kózdeı­di. Bul qujatty Tájik­stan jaǵy 2018 jylǵy shilde­de ratı­fı­ka­sııalaǵan. Osy má­se­lelerdi aıta otyryp Q.Qasymov, zań joba­synyń áleýmettik-qu­qyqtyq saldarǵa soqpaıtynyn jáne qo­symsha qarajatty talap etpeı­tinin eskertti.

Baıandamadan keıin birneshe depýtat kóptegen máseleni anyqtaý maqsatymen suraqtar qoıdy. Sonyń ishinde Asylbek Sma­ǵulov pen Pavel Kazansev jyl saıyn Qazaqstanǵa 460 myń­daı mıgrant kelse, sonyń 9 paıyzǵa jýyǵy Tájikstan aza­mattary ekenin aıta otyryp, olardyń qos azamattyq alý qu­qy bar bolǵandyqtan, bizdiń aza­mat­tyǵymyzdy qosa alyp, zeı­netaqy nemese basqa da áleý­mettik tólemderdi zańsyz alyp jatsa, olarǵa qanshalyqty tos­qaýyl jasalady dep surady.

Bul suraqtarǵa mınıstr qos azamattyq negizinen shekaralyq qyzmetten ótkenderdiń tirkelý bazasy arqyly anyqtalatynyn aıtty. Bizdiń eldiń aýmaǵyna Tájikstan azamaty bolyp ót­kender tirkelip, málimetter bazasyna alynǵandyqtan, ondaılar Qazaqstan azamattyǵyn qosa al­ǵysy kelse, sol málimetterdiń negi­zinde oǵan azamattyq berý­den bas tartylady, deı kelip, jal­py qos azamattyqpen júrgen­derdiń bar ekenin de mınıstr atap ótti. Al basqa eldiń Ishki is­ter mınıstrligine saýal ja­saý arqyly kúdiktiniń azamat­tyǵy bar-joǵyn anyqtaý qıyn kó­rinedi, óıtkeni mundaı málimet­ter konfıdensıaldyq qupııa bol­ǵan­dyqtan berilmeıdi eken. Son­dyqtan qazir Reseı, Ázerbaıjan, Túrikmenstan, Qyrǵyzstan, Ar­menııa jáne t.b. eldermen qos azamattyqty anyqtaý joldaryn qarastyratyn Kelisim ázir­lenip jatqan kórinedi.

Zań jobasy týraly qosymsha baıandamany Zańnama jáne sot-quqyqtyq reforma komıtetiniń múshesi Vasılıı Oleınık jasady. Ol jalpy álemdik mıg­ra­sııalyq prosesterdiń damýy jaǵdaıynda zań jobasyn ratı­fı­kasııalaýdyń ózektiligin atap ótti. Sonymen birge depýtat zań jo­ba­sy eki eldiń arasyndaǵy mıg­ra­sııa salasyndaǵy yntymaq­tas­tyqty damytýmen qatar, zań­syz mıgrasııaǵa qarsy kúresti jan­dan­dyrýǵa yqpal etetinin aıtty.

Shaǵyn talqylaýdan keıin zań jobasy tolyq maquldanyp, Se­nattyń qaraýyna jiberildi.

Jalpy otyrysta qaralǵan taǵy eki zań jobasy Qazaq­stan men Tájikstan Respýblı­ka­la­rynyń úkimetteri arasynda qol qoıylǵan keıbir kelisimderdi ratıfıkasııalaýǵa arnaldy. Atap aıtqanda, «Qazaqstan Res­pýb­lıkasy azamattarynyń Tájik­stan Respýblıkasynyń aýma­ǵynda jáne Tájikstan Respýb­lıkasy azamattarynyń Qazaq­stan Respýblıkasynyń aýma­ǵyn­da bolý tártibi týraly keli­sim» men «Qazaqstan Respýblı­ka­sy­nyń Úkimeti men Tájikstan Res­pýb­lıkasynyń Úkimeti arasyndaǵy adamdardyń readmıssııasy týraly kelisimdi jáne Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy adamdardyń readmıssııasy týraly kelisimdi iske asyrý tártibin atqarý týraly hattamany» ratıfıkasııalaýǵa arnalǵan zań jobalary boldy.

Bular týraly da negizgi baıan­damany Ishki ister mınıstri Q.Qasymov jasady. Alǵashqy Kelisimde Qazaqstan men Tájik­stan azamattarynyń Tarap­tar­dyń aýmaǵynda mindetti tir­keýsiz bolý merzimin 30 kúnge deıingi merzimge ulǵaıtý, son­daı-aq taraptardyń aýmaǵynda memlekettik shekarany kesip ótkennen keıin 90 kúnge deıin bolýy aıqyndalady. Baıan­damada bul Kelisim bir memleket azamattarynyń ekinshi mem­lekettiń aýmaǵynda bolýy úshin qolaıly jaǵdaılar jasaýǵa yqpal etetini aıtyldy. Ekinshi zań jobasy 2018 jyldyń 14 naýryzynda Astanada qol qoıylǵan Readmıssııa týraly kelisimdi jáne osy kelisimdi iske asyrý tártibin atqarý týraly hattamany ratıfıkasııalaýǵa arnalǵan. Bul qujat memleketter aýmaǵyna ulttyq zańnamalardy buzyp kirgen nemese sonda júrgen adamdardy memleketterdiń quzyretti organdarynyń berýi jáne qabyldaýy máseleleri bo­ıynsha Qazaqstan men Tájikstan úkimetteriniń arasyndaǵy yn­ty­maqtastyqtyń quqyqtyq negiz­derin jasaýǵa baǵyttalǵan.

Eki zań jobasy da shaǵyn talqylaýdan keıin tutastaı ma­qul­danyp, Senattyń qaraýy­na jiberildi. Bulardan basqa, depýtattardyń bastama­shyl­dyǵymen ázirlengen memlekettik qyz­met kórsetýlerge ózgerister men tolyqtyrýlar engizetin zań jobasy jáne keıbir zańnamalyq aktilerge ońaltý jáne ban­krot­tyq rásimderin jetildirý máse­leleri boıynsha ózgerister men tolyqtyrýlar engizý týraly zań jobalary Májilistiń qaraýyna qabyldanyp, olar týraly qorytyndy ázirleý merzimi belgilendi.

Jaqsybaı SAMRAT,

«Egemen Qazaqstan»