Barsha qazaqstandyqtar el Táýelsizdiginiń 27 jyldyq merekesin kóterińki kóńil kúımen atap ótýde. Bul óz kezeginde osynaý ulyq meıramnyń elimiz úshin asa mańyzdy ekenin bildirse kerek.
Táýelsizdik qolǵa tıisimen Elbasy N.Nazarbaev bastaǵan el-jurtymyz damýdyń dara da dańǵyl jolyna tústi. Osy oraıda Ata Zańymyzdyń qabyldanýy, Qarýly Kúshterimizdiń qurylýy, shekaramyzdyń shegendelýi, Arqa tórinde jańa Astananyń óz sánimen boı túzeýi, ekonomıkamyzdyń órkendeýi, shettegi qandastarymyzdyń atajurtyna oralýy jáne basqa da sheshimin tapqan ıgilikti ister sanamyzda jańǵyrady. Munyń barlyǵy shırek ǵasyrdan astam ýaqyttyń ishinde elimizdiń mártebesi bıik, bedeli zor memleketke aınalǵanyn qapysyz uqtyrady.
Bul rette Elbasynyń bastamalary arqasynda elimizdiń ıadrolyq qaýipsizdikti nyǵaıtý salasynda kóshbasshy el retinde tanylǵanyn aıryqsha atap ótýimiz kerek. Buǵan qosa, elimizdiń bitimgerlik baǵytyndaǵy bastamalaryna halyqaralyq qoǵamdastyq joǵary baǵasyn berip otyrǵanyn da maqtanyshpen aıtamyz. Munyń barlyǵy Qazaqstannyń tartymdylyǵyn arttyryp, elimizdiń BUU Qaýipsizdik Keńesine múshelikke saılanýyna, osy uıymǵa tóraǵalyq etýine jol ashty.
Elimizdiń halyqaralyq jáne aımaqtyq uıymdardyń jumysyna belsendi aralasyp otyrǵany da kóńil qýantady. Qazaqstannyń 2010 jyly EQYU-ǵa, 2011-2012 jyldary IYU-ǵa tóraǵalyq etkeni sózimizdiń dáleli bola alady. TMD-da alǵashqy bolyp EKSPO-2017 kórmesin uıymdastyrǵany da basty tabystarymyzdyń biri.
Qazaqstannyń básekege qabiletti, damyǵan 50 eldiń qataryna qosylǵany elimizdiń bolashaǵy jarqyn ekenin kórsetip berdi. «Nurly jol» baǵdarlamasy syndy memlekettik aýqymdy jobalardyń tıimdi iske asyrylýynyń arqasynda júzege asyrylǵan ıgi isterdiń jasampaz tarıhy qalyptasty. Elimizdiń ekonomıkasyna quıylǵan qyrýar ınvestısııa halyqaralyq bıznes-qaýymdastyqtyń Qazaqstanǵa degen zor senimin rastaıdy. Halyqtyń ál-aýqatyn arttyrý, jumyssyzdyqty qysqartý, jas urpaqty ýaqyt talabyna saı tárbıelep, bilim nárimen sýsyndatý, ásirese aýyldardy qoldaý sharalary óziniń oń nátıjesin kórsetti.
El birligin nyǵaıtý memlekettiń basym baǵyttarynyń biri bolǵandyqtan, osy oraıda qolǵa alynǵan sharalar óziniń aýqymdylyǵymen daralanyp tur. Bul arada Elbasy bastamasymen qurylǵan QHA-nyń ornyn erekshe atap ótkenimiz oryndy.
Elimizdiń mádenı-rýhanı ómirine qatysty atqarylǵan sharalar óte kóp. Máselen, «Mádenı mura» jobasy aıasynda uıymdastyrylǵan sharalar, Qazaq handyǵynyń 550 jyldyǵynyń toılanýy, «Rýhanı jańǵyrý» baǵdarlamasynan týyndaıtyn mindetterdiń kún tártibine qoıylýy, qazaq tili álipbıin latyn qarpine kóshirý isiniń bastalǵany jáne basqa da aýqymdy jumystar halqymyzdyń rýhanı ómirine tyń serpin berdi.
Elbasynyń shettegi qandastarymyzdy atamekenge shaqyrýy nátıjesinde 1 mıllıonnan astam qazaqtyń elge qonys aýdarýyn táýelsizdik tabystarynyń biregeıi desek qatelespeımiz. Bul kósh áli de jalǵasa bermek.
Elimiz jastardy qoldaý isine aıryqsha kóńil bólip keledi. Basqasyn bylaı qoıǵanda, bir ǵana «Bolashaq» baǵdarlamasy arqyly búginge deıin 13 myń jas óren álemniń ozyq oqý oryndarynda bilim aldy. Elbasynyń bastamasymen 2019 jyl Jastar jyly dep belgilenýi de memlekettiń jastardy qoldaýǵa ekpin túsirip otyrǵanyn uqtyrady.
Elimizde memlekettik kásibı apparat qurý, esep beretin memleketti qalyptastyrý, zań ústemdigin qamtamasyz etý syndy mindetter júzege asyrylýda. Bul oraıda halyq Elbasy usynǵan «100 naqty qadam» Ult josparynyń ıgiligin kórip otyr. Atalǵan saladaǵy sharalar «Sıfrly Qazaqstan» baǵdarlamasy aıasynda odan ári jańasha sıpatta jalǵasyn tappaq.
Qoryta aıtqanda, álemniń eń damyǵan 30 eliniń qataryna qosylýdy maqsat etken Qazaqstanda táýelsizdik jyldaryndaǵy tabystaryn odan ári eseleı túsýdiń barlyq alǵysharttary qalyptasqan. Bul el Táýelsizdiginiń baıandylyǵyn, halqymyzdyń bolashaǵynyń jarqyn ekenin bildiredi.
Joldybaı BAZAR,
«Egemen Qazaqstan»