Táýelsizdik týdyrǵan talanttar

Dımashtyń dara daýysy dúnıeni dúr silkintip, jahannyń jańalyǵy bolǵanyna kóp ýaqyt óte qoıǵan joq. Osy az ǵana ýa­qyttyń ishinde álemdik deń­geıde qubylysqa aınalǵan darynnyń ónerdegi eń alǵash tusaýyn kes­ken eleýli oqıǵa – 2015 jyly Vıtebsk qalasynda ótken XXIV Halyqaralyq estra­dalyq án oryndaýshylardyń «Slavıan bazary-2015» baıqaýy. Baıqaýdyń Gran-prıin jeńip alǵan aıtýly sát ánshi ómirine óziniń úlken ózgerisin de qosa ala keldi. Áıt­kenmen, odan keıin de talaı án baıqaýlarynda top jaryp júrgen talantty jahan tanyp, ataǵy shartarapty sharlaǵan tarıhı sát Dımashtyń Qytaıda ótken «I am a singer» jobasyndaǵy juldyzdy óner kórsetýinen keıin tipti órshidi. Búginde Dımashty tanymaıtyn el kem de kem. О́tkende ǵana ánshiniń London qalasynda qazaq tilinde ótken konsertine ıne shanshar oryn qaldyrmaı jınalǵan aǵylshyn jurtynyń ánge, Dımash ónerine degen ystyq yqylasy – tutastaı qazaq ultyna degen qurmet pen bas ııýdi bil­dirse kerek. 

Dımashtyń ónerdegi jańa­lyǵyn jalǵap, ókshe basyp kele jatqan inisi Rahat-Bı Ábdisaǵın esimi de búginde mýzykadaǵy álem tanyǵan fenomenge aınalyp úlgerdi. 10 jasynda jańalyq jasap, alǵashqy klassıkalyq týyndysyn ómirge ákelgen álemdegi eń jas kásibı kompozıtor Rahat-Bı Ábdisaǵın esimimen qazaq eli Memleket basshysy Nursultan Nazarbaevtyń «Rýhanı jań­ǵyrý» baǵdarlamasy aıasynda jú­zege asqan «Qazaqtyń 100 ja­ńa esimi» jobasy barysynda etene tanysty. Joba je­ńim­pazdaryn quttyqtaýǵa ar­nalǵan saltanat­ty jıynda Elba­sy jas daryn­nyń teńdessiz shy­ǵar­mashylyq qabiletine tánti bolyp, órimtal talant ónerin áıgili Mosart shyǵarmalarymen teń qoıa tańdanǵanyn sol sátke kýá bolǵandar áli umyta qoıǵan joq. 

Iá jahan nazaryn ózine aýdartqan óner ıesiniń sheksiz talanty búginde shartarapqa tanylyp, týyndylary álemniń aıtýly sahnalaryn moıyndatyp úlgerdi. Áli 20-ǵa da tolmaǵan mýzykant búginge deıin sımfonııalyq orkestrge jáne ár janrdaǵy kameralyq ansamblderge arnalǵan 100-den asa klassıkalyq mýzykalyq týyndynyń avtory. 

Al kıno áleminde 2018 jyl­dyń úzdigi atanǵan Samal Eslıa­movanyń orny aıryqsha. Ma­myr aıynda Fransııanyń Kann qalasynan jetken «Samal – úzdik aktrısa» degen aqjoltaı habar tórtkúl dúnıe nazaryn qazaq eline burǵyzsa, araǵa az ýaqyt salyp Túrkııanyń Anta­lııa qalasynda ótken 55-shi Ha­lyq­aralyq kınofestıvali de rejısser Sergeı Dvorsevoıdyń «Aıka» fılmindegi róli úshin talantty aktrısany úzdik dep tanydy. 

Sonymen qatar qazaq óne­riniń ǵana emes, esimin dúnıe jú­zi tanyǵan klassıkalyq mýzyka maıtalmanyna aınal­ǵan Alan Bóribaevtyń dırıjer tuǵyryndaǵy tabys­ty izdenisi de búginde jer ja­han­dy tańǵaldyra tańdaı qaqqy­zyp keledi. 2003-2007 jyldary Astana Memlekettik fılar­monııasy sımfonııalyq orkes­triniń bas dırıjeri, 2004-2007 Maınıngenniń (Germanııa) bas mýzyka dırektory, 2007 jyly Norrchıopıng sımfonııalyq or­kestrin (Shvesııa), 2007 jy­ly nıderlandtyq Brabant orkes­trin, al 2009 jyldan bastap Irlandııanyń Ulttyq sım­fo­nııalyq orkestrin basqarǵan Alan Bóribaev qazirgi tańda «Astana Opera» memlekettik opera jáne balet teatrynyń bas dı­rıjeri qyzmetinde. Áıgili maestronyń shyǵarmashylyq qııalyna qanat bitirgen L.Hamıdı men A.Jubanovtyń áıgili «Abaı» operasy jańa zaman tilinde kórermenge jol tartqan bolatyn. Álemge qazaq ulttyq opera ónerin áıgilep júrgen aıtýly týyndy bıyl Memlekettik syılyqtyń laýreaty atandy. 

Sol sekildi búginde opera óne­riniń álem moıyndaǵan jaryq juldyzyna aınalǵan Súndet Baıǵojın, 27 jasynda elimizdiń bas orkestri – 85 jyldyq tarıhy bar Qurmanǵazy atyndaǵy Qazaq memlekettik akademııalyq ult aspaptar or­kestriniń bas dırıjeri qyz­metine taǵaıyn­dalyp, ja­qyn­da ǵana Qurmanǵazy atyn­da­ǵy Qazaq ulttyq kon­ser­­va­to­rııasynyń rektory qyz­metine kirisken Arman Jú­debaev syndy jalyndy jastardyń óz salasynyń kásibı bilikti ma­many atanyp qana qoımaı, óner áleminde jahan tańdana qa­raıtyn jańalyq týdyrýǵa degen umtylysy men jeńisi qaı kezde de ultymyzdyń maq­ta­nyshy hám abyroıy.

Bul da bolsa qa­sıetti táýelsizdigimiz týdyr­ǵan talantty jastardyń shy­ǵar­mashylyǵyna qanat baılap, úne­mi shabytqa bólep kele jat­qan eńseli eldigimiz ekeni sózsiz.

Nazerke JUMABAI, 

«Egemen Qazaqstan»