Qazaq sportshylarynyń búgingi jeńisi men jetistiginiń barlyǵy Táýelsizdiktiń arqasynda dep bilemin. El ómirindegi eń eńsesi bıik, tegeýrini tekti mereke – Təýelsizdik meıramy. О́ıtkeni bul kúnniń maǵynasy men mən-mazmuny asa tereń.
Meniń Qytaıdaǵy balalyq shaǵym Altaı oblysyndaǵy Ertis ózeniniń boıynda ótti. Qarapaıym qazaq aýylynda týyp óstik. Eseıe kele álemde Qazaq eli bar ekenin bildik. Qytaıda júrip eń alǵash boks úıirmesine barǵanda jattyqtyrýshy aǵaı bizden «munda nege keldińder» dep surady. Bárimiz bir aýyzdan chempıon bolýǵa kelgenimizdi aıttyq. Sonda ol kisi «maǵan chempıonnyń keregi joq. Birinshi adam bolýlaryń kerek» dep edi. «Sender chempıon bolyp, artynan tilderińdi shaınap, bir jerde topyraqqa aýnap jatsańdar nemese el amandasa almaıtyndaı dárejede taltańdap júrseńder ol durys bolmaıdy» degen edi. Sonda ǵana chempıon degen ataqtyń artynda ulttyq múdde, qanshama jaýapkershilik jatqanyn túsingendeı boldym. Qaı salada, qaı kásipte bolsyn ulttyń múddesi bıik turmasa, ol adam úlken jetistikke jete almaıdy.
«Qazaqstanǵa ketemiz» degen sóz bala kúnnen qulaqqa ábden sińisti bolyp qalǵan ári úlken medeý bolatyn. Men Qytaı elinde de Qazaqstandy arqalanyp júrdim. Qazaqstannyń azamattyǵyn alýǵa sheshim qabyldanǵan kezde Qytaı boks federasııasy basshylaryna: «Júregim – qazaq dep soǵady. Otbasym osynda. Atajurtymda shańyraq kóterdim. Aǵaıyn-týystarymnyń barlyǵy osy jaqta. Sondyqtan Qazaqstan atynan judyryqtasýǵa ruqsat etińizder», dep aldarynan ótip, ótinish hat jazdym. Maqsatym – Qazaqstannyń kók baıraǵy astynda Olımpııa oıyndaryna qatysyp, altyn júlde ıelený bolatyn. Degenmen ortaǵa saıasat aralasyp, Olımpıadaǵa bara almaıtyn boldym. Qytaı jaǵy ruqsat bermeı qyrsyǵyp otyryp aldy. Áıtpese bas bapker Myrzaǵalı Aıtjanovtyń shaqyrtýymen ulttyq quramamen birge jattyǵý jumystaryna da qatystym.
Londonǵa bara almaıtynymdy bilgen kezde kóńil kúıim qatty túsip ketip edi. Olımpııa oıyndaryna bara almasam da, sol ýaqytta «Astana arlandary» boks klýbynda Qazaq eliniń namysyn qorǵadym. Bul da men úshin jubanysh boldy. Qytaıdan kelgendegi maqsatym qaı jarysta bolsyn qazaqtyń namysyn qorǵaý edi. Sol kúnge jetkizgen Qudaıǵa shúkir deımin. Sondyqtan Təýelsizdigimiz uzaǵynan ári baıandy bolsyn! Təýelsiz eldiń baǵy da joǵary, aspany da keń. Biz sondaı baqqa jetken halyqpyz. Elimiz gúldene, nurlana bersin!
Qanat ISLAM,
kásipqoı boksshy